BMT-nin ali komissarı Azərbaycanın mövqeyi barədə məlumatlandırılıb

Xarici işlər naziri Ceyhun Bayramov İsveçrə Konfederasiyasına işgüzar səfəri çərçivəsində BMT-nin insan hüquqları üzrə ali komissarı Folker Türk ilə görüşüb.

Nazir Ceyhun Bayramov ölkəmizin BMT-nin insan hüquqları mexanizmləri ilə konstruktiv dialoq və qarşılıqlı etimad çərçivəsində fəal şəkildə əməkdaş­lıq etdiyini bildirib. İnsan hüquqlarının fundamental prinsiplərinin müdafiəsinə tam şəkildə sadiq olan Azərbaycanın beynəlxalq insan hüquqları sisteminin gücləndirilməsinə, mədəniyyətlərarası və dinlərarası dialoqun təşviqinə mütə­madi əsasda töhfə verdiyini vurğulayıb. 

Regiondakı son vəziyyət barədə Azərbaycanın mövqeyini qarşı tərəfin diqqətinə çatdıran nazir Ceyhun Bay­ramov Ermənistanın davam edən hər­bi-siyasi təxribatlarından, habelə ölkə­mizin ərazi bütövlüyü və suverenliyinə qarşı bəyanatlarından söz açıb. 

Görüşdə 30 ilə yaxın işğal dövrün­də Ermənistanın müharibə və insanlığa qarşı cinayətlər törətdiyi, o cümlədən etnik təmizləmələr həyata keçirdiyi qeyd olunub.

Bölgədə “humanitar vəziyyət” və “blokada” barədə iddiaların əsassız olduğu, Ermənistanın Laçın sərhəd buraxılış məntəqəsinə qarşı təxribatla­rının, Ağdam-Xankəndi yolundan yük­lərin daşınmasına törədilən maneçilik­lərin, Azərbaycanın ərazi bütövlüyü və suverenliyinə qarşı davam edən iddia­ların, Azərbaycan ərazilərindən erməni silahlı qüvvələrinin hələ də çıxarılma­masının sülhə və təhlükəsizliyə təhdid olduğu vurğulanıb.

Görüşdə, həmçinin nazir Ceyhun Bayramov işğaldan azad edilmiş əra­zilərdə Ermənistan tərəfindən basdı­rılmış yüz minlərlə minanın günahsız insanların həyatına son qoymaqda da­vam etdiyini bildirib.

***

Dünən xarici işlər naziri Ceyhun Bayramov BMT-nin İnsan Hüquq­ları Şurasının 54-cü sessiyasında iştirak və çıxış edib.

Çıxışda Azərbaycan və BMT İnsan Hüquqları Şurası arasında əməkdaşlıq, ölkəmiz tərəfindən milli və beynəlxalq səviyyədə insan hüquqları sahəsində görülmüş işlər, habelə postmünaqişə dövründə insan hüquqlarının qorunma­sı sahəsində mövcud çağırışlar barədə ətraflı məlumat verilib.

Nazir Ceyhun Bayramov, ölkəmi­zin Ümumdünya İnsan Hüquqları Bə­yannaməsindən irəli gələn hüquqların qorunmasına sadiq şəkildə bu sahədə fəaliyyət göstərən qurumlarla aktiv dia­loqu, habelə BMT-nin İnsan Hüquqları üzrə Ali Komissarlığının fəaliyyətinə töhfə verilməsini davam etdirdiyini bil­dirib. Azərbaycan tərəfindən milli sə­viyyədə bu sahədə aparılan islahatlar, o cümlədən qanunvericilik bazasının inkişafı, siyasi partiyalarla dialoqun möhkəmləndirilməsi, medianın inkişa­fına dəstək, fiziki məhdudiyyətləri olan şəxslər üçün şəraitin yaxşılaşdırılma­sı, qadın və gənclərin səlahiyyətlərinin genişləndirilməsi, dövlət xidmətlərinin əlçatanlığının artırılması üçün görülən işlər barədə ətraflı məlumat verilib.

İnsan hüquqları sahəsində milli və beynəlxalq səviyyədə görülən işlərə baxmayaraq, bu istiqamətdə fəaliyyət göstərən qurumların mandat sahibləri tərəfindən müvafiq dövlətlərin mövqe­yini və bölgədə mövcud faktlar və re­allıqları nəzərə almayan ittihamlar irəli sürülməsinin məyusluq doğurduğu, bu kimi instansiyaların nüfuzunu və onlara olan inamı sarsıtdığı, bu xüsusda sözü­gedən pozuntuların aradan qaldırılma­sının vacibliyi vurğulanıb.

Nazir Ceyhun Bayramov münaqişə­nin bitməsinə baxmayaraq bölgədə dayanıqlı sülhün bərqərar edilməsinin qarşısında bir sıra çağırışların, o cüm­lədən Ermənistan tərəfindən hərbi-si­yasi təxribatların, mina təhdidinin da­vam etdirilməsi, müharibə zamanı itkin düşmüş 4 minə yaxın azərbaycanlının taleyi barədə məlumatların bugünədək verilməməsi, 1987-1991-ci illər arasın­da indiki Ermənistan ərazilərində etnik təmizləmə siyasətinə məruz qalmış azərbaycanlıların hüquqlarının inkar olunması, Qarabağ bölgəsində məs­kunlaşmış erməni sakinlərin manipul­yasiya edilməsi ilə reinteqrasiya səy­lərinə zərbə vurulmasının dayandığını vurğulayıb. 

Çıxış zamanı, həmçinin bölgədə da­yanıqlı sülhün və təhlükəsizliyin bərqə­rar edilməsi üçün yaranmış tarixi imka­nın itirilməməsi məqsədilə beynəlxalq ictimaiyyətin ədalətli mövqeyinin hər zamankından daha müstəsna əhəmiy­yət kəsb etdiyi bildirilib.

***

Dünən xarici işlər naziri Ceyhun Bayramov Cenevrə Universiteti­nin Qlobal Araşdırmalar İnstitutu ilə birgə “Regional təhlükəsizlik və Azərbaycanın Mərkəzi Asiya ölkələri ilə əməkdaşlığı” mövzu­sundakı dəyirmi masada çıxış edib. 

Nazir ölkəmizin xarici siyasət priori­tetləri, qonşu ölkələrlə əlaqələrin pers­pektivləri, mövcud regional təhlükəsiz­lik məsələləri, çağırışlar və imkanlar barədə danışıb. 

Cənubi Qafqaz və Mərkəzi Asiya bölgələrinin, o cümlədən baş verən re­gional proseslərin əlaqəliliyindən bəhs edən nazir Ceyhun Bayramov son dövrlər ərzində həm ikitərəfli əsasda, o cümlədən çoxtərəfli platformalar çər­çivəsində münasibətlərin inkişafında intensivliyin müşahidə olunduğunu bil­dirib. 

Nazir Ceyhun Bayramov, həmçinin Ermənistan baş nazirinin Azərbayca­nın ərazi bütövlüyünün tanınması ilə bağlı verdiyi bəyanata baxmayaraq, ərazilərimizdə separatizmi təşviq edən ziddiyyətli açıqlamalar səsləndirməsi­nin anlaşılan olmaması ilə yanaşı, sülh prosesinin gələcəyini sual altında qoy­duğunu bildirib. 

***

Həmin gün xarici işlər naziri Cey­hun Bayramovun BMT-də Akkre­ditə Olunmuş Müxbirlər Assosia­siyasında (ACANU) aparıcı media qurumları üçün brifinqi təşkil olu­nub.

Brifinqdə çıxış edən nazir Ceyhun Bayramov Azərbaycan Respublikasının xarici siyasət gündəliyində duran aktu­al məsələlər, postmünaqişə dövründə bölgədə mövcud vəziyyət və Azərbay­can və Ermənistan arasında normal­laşma prosesi barədə iştirakçıları ətraflı məlumatlandırıb, jurnalistlərin çoxsaylı suallarını cavablandırıb.

XQ