Naxçıvan Dövlət Universiteti, Türkiyənin Qars Qafqaz Universiteti və İqtisadi İnkişaf və Sosial Tədqiqatlar İnstitutunun (İKSAD) birgə keçirdiyi “I Beynəlxalq İpək Yolu” konfransında 15 ölkədən 300-dən çox məruzəçi iştirak edib.

Naxçıvan Dövlət Universitetinin rek­toru Elbrus İsayev konfransı açıq elan edərək qeyd edib ki, Avropa ilə Asiyanı birləşdirən, keçdiyi ərazilərdə yaşayan xalqların həyatında mühüm rol oynayan Böyük İpək yolu ölkəmizin iqtisadi və mədəni inkişafına da öz müsbət təsiri­ni göstərib. Elbrus İsayev vurğulayıb ki, beynəlxalq konfransın İpək yolun üstün­də strateji mövqedə yerləşən Naxçıvan­da keçirilməsi bu bölgənin beynəlxalq nəqliyyat dəhlizi kimi önəmini, eləcə də regionda və ətraf ölkələrdə iqtisadi-mə­dəni əlaqələrinin inkişafının aktuallığını ön plana çıxarır.

Bildirilib ki, İpək yolunun bərpası ümummilli liderimiz Heydər Əliyevin adı ilə bağlıdır. Ulu öndərin bu tarixi yolun bərpası üzrə beynəlxalq konfransın keçi­rilməsi haqqında 1998-ci il 7 iyun tarixli sərəncamı Azərbaycanın dünya birliyi ölkələri ilə inteqrasiyasının gücləndiril­məsində müstəsna rol oynayıb. Zəngə­zur dəhlizinin fəaliyyətə başlamasında isə “Türk qapısı” adlandırılan Naxçıvan mühüm rol oynayacaq. 

Qars Qafqaz Universitetinin rektoru Hüsnü Kapu çıxışında belə konfrans­ların keçirilməsinin türkdilli xalqların bir-birinə daha da yaxınlaşması, eləcə də ümumtürk mədəni irsinin təbliğ edil­məsi baxımından əhəmiyyətinə toxunub. Azərbaycan Dövlət Pedaqoji Universiteti­nin beynəlxalq əlaqələr üzrə prorektoru, professor Mahirə Hüseynova əməkdaşlıq çərçivəsində türk dünyası ilə bağlı tədbir­lərin, eyni zamanda tarixi İpək yolunun canlandırılmasına dair müxtəlif layihələ­rin həyata keçirilməsinin vacibliyini qeyd edib.

Konfransda AMEA Naxçıvan Bölmə­sinin sədri, akademik İsmayıl Hacıyevin, İqtisadi İnkişaf və Sosial Tədqiqatlar İnsti­tutunun prezidenti Mustafa Latif Emekin, Naxçıvan Müəllimlər İnstitutunun rektoru Azad Novruzovun, Atatürk Universiteti­nin professoru Hüseyn Yurtdaşın, AMEA Naxçıvan Bölməsinin akademiki Ha­cıfəxrəddin Səfərlinin, Özbəkistanın İpək Yolu Araşdırma Akademiyasının sədri Azamat Akbarovun, onlayn formatda konfransa qoşulan Beynəlxalq Türk Aka­demiyasının prezidenti, akademik Şahin Mustafayevin, ABŞ-nin Purdue Universi­tetinin professoru Jamaluddin Husainin, Adana Çuxurova Universitetinin pro­fessoru Hakkı Çiftçinin mövzu ətrafında çıxışları dinlənilib.

İqtisadi İnkişaf və Sosial Tədqiqat­lar İnstitutunun prezidenti Mustafa Latif Emek konfransın təşkilatçılarına plaket təqdim edib.

Konfrans ənənəvi və onlayn formatda olmaqla 23 bölmədə davam edib.

Səbuhi HƏSƏNOV,
“Xalq qəzeti”