Milli Məclisin Sədri Sahibə Qafarova Serbiya Respublikasına rəsmi səfəri çərçivəsində mayın 25-də bu ölkənin Prezidenti Aleksandar Vuçiç ilə görüşüb.
Azərbaycan parlament nümayəndə heyətini səmimiyyətlə salamlayan Aleksandar Vuçiç, dost və strateji tərəfdaş olan ölkələrimiz arasında münasibətlərin yüksək səviyyədə olmasından məmnunluğunu bildirib.
A.Vuçıç ölkəmizdə baş verən prosesləri çox yaxından izlədiyini vurğulayıb, Azərbaycanın Prezident İlham Əliyevin rəhbərliyi ilə qazandığı nailiyyətləri yüksək qiymətləndirib. Serbiya Prezidenti Azərbaycan Prezidenti İlham Əliyevlə görüşlərini məmnunluqla xatırladaraq, bu görüşlər zamanı əldə olunmuş razılaşmaların və imzalanmış sənədlərin ölkələrimiz arasında əlaqələrin daha da dərinləşməsinə mühüm töhfələr verdiyini diqqətə çatdırıb.
Milli Məclisin Sədri Sahibə Qafarova göstərilən yüksək qonaqpərvərliyə görə minnətdarlığını bildirərək, Azərbaycan Prezidenti İlham Əliyevin salamlarını Serbiya Prezidentinə çatdırıb.
Bu səfərin Azərbaycan Milli Məclisinin Sədri səviyyəsində Serbiyaya ilk rəsmi səfər olduğunu deyən Sahibə Qafarova, inamını ifadə edib ki, bu səfər ölkələrimiz arasında əlaqələrin daha da möhkəmlənməsinə və genişlənməsinə töhfə verəcək.
Serbiya Prezidenti Aleksandar Vuçiç, Prezident İlham Əliyevin salamlarına görə minnətdarlığını bildirərək, onun da salamlarını Azərbaycanın dövlət başçısına çatdırmağı xahiş edib.
Sahibə Qafarova Serbiya Respublikasına rəsmi səfəri çərçivəsinddə bu ölkənin Milli Assambleyasının sədri Vladimir Oriçlə görüşüb. Görüşdə qarşılıqlı maraq doğuran məsələlər ətrafında fikir mübadiləsi aparılıb.
Sonra Azərbaycan və Serbiya parlamentləri arasında anlaşma memorandumu imzalanıb. İki ölkənin parlament rəhbərləri bu memorandumun münasibətlərin daha da genişlənməsinə xidmət edəcəyinə inamlarını ifadə ediblər.
***
Milli Məclisin Sədrinin rəhbərlik etdiyi nümayəndə heyəti Serbiya Respublikasına səfəri çərçivəsində Belqraddakı Taşmaydan parkında ümummilli lider Heydər Əliyevin və görkəmli serb yazıçısı Milorad Paviçin abidələrini ziyarət edib. S.Qafarova abidələrin önünə əklil qoyub.
Ə.BƏDƏLOV, “Xalq qəzeti”
