Dünyanın ən böyük aviasiya, kosmonavtika və texnologiya festivalı TEKNOFEST İstanbuldan sonra Ankara və İzmirdə keçiriləcək.
TEKNOFEST-in mətbuat xidmətindən “Anadolu”ya verilən məlumata görə, əvvəlcə cümhuriyyətin 100 illiyi münasibətilə Türkiyənin üç böyük şəhərində keçirilməsi planlaşdırılan festivalın ikinci məkanı Ankara olacaq.
Festival Türkiyənin paytaxtında avqustun 30-dan sentyabrın 3-dək, İzmirdə isə sentyabrın 27-dən oktyabrın 1-dək keçiriləcək.
Festival çərçivəsində Ankara və İzmirdə müxtəlif tədbirlər, o cümlədən hava şouları, texnologiya yarışmaları, mükafatlandırma mərasimləri, səhnə çıxışları, ustad dərsləri, elmi şoular, maarifləndirici seminarlar, uçuşlar təşkil olunacaq.
Ankarada festival Etimesqut hava limanının ərazisində, İzmirdə - Çiğlidə keçiriləcək.
Bu il TEKNOFEST 2023 texnologiya yarışmasında iştirak etmək üçün 333 000-dən çox komanda və 1 milyondan çox iştirakçı müraciət edib.
S.ELAY,
"Xalq qəzeti"
