İrəvanda ağırlıqqaldırma üzrə Avropa çempionatında qızıl medal qazanmış türkiyəli atletlər Nuray Güngör, Cansu Bektaş, Yusuf Fehmi Genc və gümüş mükafatçı Qamze Altun Bakıya gəliblər.
Heydər Əliyev Beynəlxalq Aeroportunda türk idmançıları Gənclər və İdman Nazirliyinin rəsmiləri, Azərbaycan Ağır Atletika Federasiyasının nümayəndələri, azarkeşlər və jurnalistlər qarşılayıblar.
Bakıya dəvətə görə Prezident İlham Əliyevə və xanımı Mehriban Əliyevaya təşəkkür edən Cansu Bektaş deyib: “Azərbaycan xalqını çox sevirəm. İrəvanda qazandığım medalı Azərbaycana həsr etdim”.
Avropa çempionatında iki qızıl, bir bürünc medal qazanan Nuray Güngör isə bildirib ki, Ermənistanda bir millət, iki dövlət olduğumuzu göstərib. Bu, bir daha Azərbaycan və Türkiyə qardaşlığının parlaq nümayişi olub.
Qitə birinciliyində fəxri kürsünün ən yüksək pilləsinə qalxan Yusuf Fehmi Genç Avropa çempionatında hər iki ölkəni çox gözəl şəkildə təmsil etdiklərini vurğulayıb.
Türkiyəli ağırlıqqaldıranların səfər zamanı paytaxtda bir sıra görüşlərdə və tədbirlərdə iştirakları nəzərdə tutulub.
Qeyd edək ki, İrəvanda ağırlıqqaldırma üzrə Avropa çempionatında mükafat qazanan və qələbələrini Azərbaycana həsr edən türk idmançılar Azərbaycan Prezidenti İlham Əliyevin tapşırığına əsasən Azərbaycana dəvət olunublar.
Leyla QURBANOVA, “Xalq qəzeti”