Son vaxtlar İran mövcud rejimə qarşı xalq etirazları ilə dünyanın diqqət mərkəzindədir. Ölkədə narazı kütlələr etiraz aksiyalarını artıq 6 aya qədərdir ki, davam etdirir. Aksiyalarda əsasən hökumət əleyhinə şüarlar səsləndirilir, hakim rejimin istefası tələb olunur.
Gunaz.TV-nin verdiyi son məlumatlara görə, ölkənin ayrı-ayrı bölgələrində gedən aksiyalara martın 28-də Güney Azərbaycanın Təbriz, Urmiya, Zəncan, Ərdəbil və Həmədan şəhərlərində çalışan müəllimlər də qoşulublar. Aksiyalar Təhsil Nazirliyinin yerli idarələri qarşısında keçirilib. Tədbirə toplaşan azərbaycanlı müəllimlər əmək haqlarının ödənilməməsinə, inflyasiya artımı ilə maaşlarının uyğun olmamasına, qanunla nəzərdə tutulmuş başqa hüquqlarının tapdanmasına etiraz ediblər. Təbrizli müəllimlər yerli təhsil idarəsinin qarşısına “Bu bina müəllimlərin əmək haqlarını ödəmək üçün satılır” məzmunlu banner asıblar.
Ölkədə təqaüdçülər, şirkət işçiləri və əhalinin digər kateqoriyaları da mütəmadi olaraq etiraz aksiyaları təşkil edirlər. Bu günlərdə Əhvaz şəhərində də belə bir aksiya baş tutub. “Azad İran” telegram kanalının məlumatına görə, təqaüdçülər Sosial Təminat İdarəsinin qarşısında toplaşaraq, qanuni haqlarını tələb ediblər. Onlar hökumətdən vətəndaşların sosial tələblərinə adekvat cavab verməyi tələb ediblər.
Ümumiyyətlə, etiraz aksiyalarında əsas tələb İran hakimiyyətinin istefasıdır. Bu fikir güneyli hüquq müdafiəçisi və siyasi məhbus Nərgiz Məhəmmədinin İnsan Hüquqları Müdafiəçiləri Təşkilatının təşəbbüsü ilə Cenevrədə keçirilən İnsan Hüquqları Şurasının iclasına ünvanladığı müraciətdə xüsusilə vurğulanıb. Onun məktubunda deyilir: “Biz hökumətdən amnistiya istəmirik. Fikrimizcə, İslam Respublikasının hakimiyyətinə son qoyulmalıdır və bu yöndə sizdən dəstək və yardım gözləyirik”.
Məktubunda İranın dini rəhbəri Əli Xameneyinin son əfv fərmanına toxunan N.Məhəmmədi bunu humanizm nümunəsi kimi deyil, Qərb və beynəlxalq ictimaiyyəti, insan haqları təşkilatlarını aldatmaq üçün atılmış addım kimi dəyərləndirib: “Avtoritar dini hökumətin antifeminist siyasəti güclənib və tələbə qızların ardıcıl zəhərlənməsi, məhbus qadınlara qarşı zorakılıqların artması zülmün davam etdiyini göstərir”.
Qeyd edək ki, əslən Güney Azərbaycanın Zəncan şəhərindən olan, İran İnsan Haqlarının Müdafiəsi Birliyinin sədr müavini Nərgiz Məhəmmədi hazırda Tehranın Evin zindanında saxlanılır. O, 10 il 8 ay həbs, 154 şallaq cəzasına məhkum edilib.
İranda son hadisələr zamanı hökumətin atdığı repressiv addımlar beynəlxalq təşkilatlar tərəfindən də pislənməkdədir. Beynəlxalq Əfv Təşkilatının yaydığı son hesabatda bildirilir ki, Tehran rejimi İran xalqlarının misli görünməmiş son qiyamı zamanı insanlara qarşı dəhşətli repressiyalara əl atıb, etirazçıları susdurmaq üçün döyüş silahlarından istifadə edib. Sənəddə həm də İrandakı etirazlarla bağlı Birləşmiş Millətlər Təşkilatı İnsan Haqları Şurasının faktaraşdırıcı komitəsinin yaradılmasından məmnunluq ifadə edilib.
Bütün bunlara baxmayaraq, Tehran rejimi etirazların amansızcasına yatırılması üçün tədbirləri gücləndirməkdədir. Bunu İran Polis Qüvvələrinin xüsusi təyinatlı bölməsinin komandanı Həsən Kərəminin bəyanatından da görmək olur. Onun sözlərinə görə, beynəlxalq ictimaiyyət, dünya dövlətləri ölkədə baş verənlərə qarışmamalıdır. İran hökuməti isə 6 aylıq etiraz aksiyalarından sonra paytaxtda polis qüvvələrinin sayının artırılması ilə bağlı yeni proqram həyata keçirmək niyyətindədir.
Kərəmi son etiraz nümayişlərinə toxunaraq, növbəti aksiyaların qarşısının vaxtında alınması üçün Tehranın 400 nöqtəsində polis güclərinin ikiqat artırılmasının vacibliyini bildirib.
Xatırladaq ki, İranda baş verən etiraz aksiyaları zamanı 71-i uşaq olmaqla 500-dən çox vətəndaş öldürülüb, 18 mindən çox etirazçı həbs edilib.
P.ƏMİRCANOV, “Xalq qəzeti”