Ukraynanın şərqində Rusiyanın xüsusi hərbi əməliyyatı davam edir. Ukrayna Silahlı Qüvvələri Baş Qərargahının verdiyi məlumata görə, rus ordusu əsas səylərini Baxmut istiqamətində cəmləşdirib. Şəhərin ələ keçirilməsi üçün hücumlar intensivləşib. Ancaq Ukrayna Silahlı Qüvvələri zərbələri dəf edə bilir. Məlumatı UNİAN verib.
Son məlumatlara görə, Kupyansk, Liman, Avdeyevka və Şaxtyorsk istiqamətlərində də hücumlar davam edib. Ukrayna ordusu sutka ərzində, ümumiyyətlə, 81 hücumu dəf edib.
Baş Qərargahın məlumatına görə, Rusiya qoşunları İran istehsalı olan “Şahid” pilotsuz uçuş aparatları ilə paytaxt Kiyevə də hücum edib. Hücum zamanı Ukrayna Hava Hücumundan Müdafiə Qüvvələri 9 aparatı məhv edib.
Ukrayna Müdafiə Nazirliyi Baş Kəşfiyyat İdarəsinin nümayəndəsi Andrey Çernyak isə bildirib ki, Rusiya Ukrayna ilə sərhəd yaxınlığına hücum təyyarələri toplayır. Çernyakın sözlərinə görə, Rusiya ordusu həmin qırıcılardan Ukraynanın strateji ərazilərinin işğalı üçün başlayacağı əməliyyatlar zamanı istifadə etmək niyyətindədir.
Ukrayna Prezidenti Volodimir Zelenski son günlərdə müzakirə olunan Çinin sülh təşəbbüsünə münasibət bildirib. “Mənə elə gəlir ki, bu, Çinin sülh planı deyil, mövcud vəziyyətlə bağlı düşüncələrdir, - deyə Zelenski qeyd edib: - Bunun sülh planı olduğunu düşünmürəm. Mənə elə gəlir ki, Çin, sadəcə, öz fikirlərini bildirib. Yaxşı ki, Çin Ukraynadakı müharibədən danışmağa başlayıb. Sözün arxasında nəyin dayanması isə başqa məsələdir”.
Qeyd edək ki, rəsmi Pekinin təklif etdiyi 12 bəndlik sülh planı haqqında Avropa İttifaqının Xarici işlər və təhlükəsizlik siyasəti üzrə nümayəndəsi Jozep Borrell də danışıb. Onun fikrincə, Ukraynadakı vəziyyətin nizamlanması üçün Çinin təklif etdiyi fəaliyyət planını məqbul hesab etmək olmaz. Çünki sənəd qurbanla təcavüzkarı eyni səviyyəyə qoyur. Eyni zamanda, burada daha vacib məsələlər çatışmır.
Paşa ƏMİRCANOV, “Xalq qəzeti”