Düz 15 ildir ki, Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” beynəlxalq məlumatlandırma kampaniyası davam edir. Faciə ilə əlaqədar dəhşətli faktlar dünya ictimaiyyətinə çatdırılır, planetin bütün guşələrində insanlar erməni millətçilərinin faşlist simasına bələd olur. Həyata keçirilməkdə olan məqsədyönlü fəaliyyət nəticəsində Xocalı faciəsini soyqırımı kimi tanıyan dövlətlərin, beynəlxalq təşkilatların sayı getdikcə artır.
Paytaxt Kişineu şəhərindəki Moldova Tarix Muzeyində “Xocalıya ədalət!” kampaniyası çərçivəsində “Əsrin faciəsi”nin 31-ci ildönümünə həsr olunmuş geniş konfrans da “Xocalıya ədalət!” şüarı ilə keçirilib. Azərbaycanın Moldovadakı səfirliyi və Moldova Azərbaycan Konqresinin birgə təşkilatçılığı ilə baş tutan tədbirdə Milli Məclisin deputatları, Moldovanın ictimai-siyasi xadimləri, Kişineudakı diplomatik korpusun nümayəndələri iştirak ediblər.
Öncə muzeyin foyesində dəhşətli soyqırımını əks etdirən fotoşəkillər nümayiş olunub. İştirakçılara Heydər Əliyev Fondunun Xocalı ilə bağlı broşürləri, “Sonsuz dəhliz” filminin diskləri, döş nişanları paylanılıb. Sonra “Histogram #Khojaly” filmi göstərilib.
Azərbaycanın Moldovadakı səfiri Qüdsi Osmanov Ermənistanın Azərbaycana qarşı ərazi iddialarından, nankor qonşuların dinc əhaliyə divan tutaraq etnik təmizləmə siyasəti yeritdiklərindən konkret faktlarla bəhs edib. O, müzəffər Ali Baş Komandan Prezidentİlham Əliyevin rəhbərliyi ilə rəşadətli Silahlı Qüvvələrimizin 44 günlük “Zəfər yürüşü” ilə torpaqlarımızı işğaldan azad etməsi sayəsində düşməndən qisas alındığını bildirib.
Moldova Respublikası Prezidenti Aparatının rəhbəri Andrey Spınu, Azərbaycan Respublikası Milli Məclisinin komitə sədri Tahir Mirkişili, Azərbaycan–Moldova parlamentlərarası dostluq qrupunun həmsədri Vitaliy Jakot, Milli Məclisinin deputatı Soltan Məmmədov, moldovalı politoloq Ruslan Şevçenko və Moldova Azərbaycan Konqresinin sədri Elçin Bayramov çıxışlarında Xocalı soyqırımı törədilməsinə görə məsuliyyət daşıyanların cəzalandırılmasının vacibliyini vurğulayıb, belə dəhşətlərin bir daha yaşanmaması üçün hər kəsin səylər göstərməsinin önəmini diqqətə çəkiblər. Heydər Əliyev Fondunun Xocalı soyqırımı haqqında həqiqətlərin dünyaya çatdırılması istiqamətində sistemli və ardıcıl fəaliyyəti qeyd olunub. Fondun vitse-prezidenti Leyla Əliyevanın təşəbbüsü ilə başlanmış “Xocalıya ədalət!” kampaniyasının əhəmiyyəti, əldə etdiyi uğurlar vurğulanıb.
Qeyd edək ki, faciənin ildönümü günündə Kişineuda anım tədbiri də keçiriləcək.
Ə.ƏLİYEV,
“Xalq qəzeti”