Dekarbonlaşma prosesi artıq seçim məsələsi deyil, bizim üçün vacibdir. Əlbəttə ki, bizim resurslarımız məhduddur və bu baxımdan atılan hər bir addım əsaslandırılmalı, ona dəstək verilməlidir. Bütün bunlar enerji sektoruna böyük sərmayələrin yatırılmasını tələb edir.

AZƏRTAC xəbər verir ki, bunu Bosniya və Herseqovinanın xarici ticarət və iqtisadi əlaqələr naziri Staşa Koşarats Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında çıxışı zamanı deyib.

O vurğulayıb ki, uğurlu enerji keçid layihələri böyük maliyyə resursları tələb edir.

“Bərpaolunan enerji mənbələrinə gəldikdə, biz nəinki ətraf mühitlə bağlı olan problemləri həll edə bilərik, o cümlədən bizim enerji sistemimizin sabitliyini təmin edə bilərik. Aydın mesaj ondan ibarətdir ki, region öz yaşıl keçidini sürətləndirməlidir ki, Avropa İttifaqı bazarda rəqabətcil qalsın. Bu baxımdan əlbəttə ki, regional əməkdaşlığın gücləndirilməsi və dərinləşdirilməsi imperativdir. Bu, yaşıl keçidi daha da sürətləndirə bilər. Əsas prioritetimiz elan edilmiş dekarbonizasiya proseslərini tətbiq etməklə enerji sabitliyi və təhlükəsizliyini təmin etməkdir. Ölkədə təbii qaz üzrə daha çox interkonnektorların yaradılması və bu enerji mənbəyinin vətəndaşlar, biznes subyektləri üçün əlçatan edilməsinə sadiqliyimizi bir daha bəyan edirik”,- deyə o qeyd edib.