Kənd təsərrüfatı heyvanları və bitkilərinin, xüsusilə tərəvəz və meyvə bağlarının sığortası, bu sahədəki yeniliklər və fermerləri maraqlandıran məsələlər Aqrar Sığota Fondu və Salyan Rayon İcra Hakimiyyətinin təşkilatçılığı ilə keçirilən “Dayanıqlı fermer təsərrüfatı üçün aqrar sığorta” tədbirində ətraflı müzakirə edilib. Bu barədə Aqrar Sığota Fondu məlumat yayıb. 

Tədbiri giriş sözü ilə açan Salyan Ra­yon İcra Hakimiyyətinin başçısı Sevindik Hətəmov kənd təsərrüfatı üçün böyük imkanların olduğu rayonda əkinçiliyin və heyvandarlığın inkişaf etdiyini bildirib. Qeyd olunub ki, Salyan rayonunda 41 min hektardan artıq əkin sahəsinin 14 min hek­tarı taxıl, 10 min hektarı pambıq, təqribən, 14 min hektarı isə yonca əkinlərinin payı­na düşür. Bununla yanaşı, Salyanda geniş meyvə bağları, tərəvəz, bostan bitkiləri, çəltik və şəkər çuğunduru da becərilir. Hazırda buradakı üzüm bağlarının sahəsi 1200 hektara yaxındır.

Salyan rayonu üzrə əkin sahələrinin yalnız 5 min hektarının sığotalandığını diqqətə çatdıran icra hakimiyyətinin baş­çısı bunun qənaətbəxş olmadığını vurğu­layıb. Buna görə də o, fermerləri dövlət tərəfindən yaradılan belə bir əlverişli im­kandan istifadə etməyə və təsərrüfatlarını sığortalamağa çağırıb.

Tədbirdə çıxış edən Aqrar Sığorta Fondu idarə heyətinin sədri Fuad Sadıqov ölkəmizdə dövlət tərəfindən yaradılan aq­rar sığorta mexanizmi, onun iş prinsipi, fermerlər üçün əhəmiyyəti barədə məlu­mat verib. Fond sədrinin sözlərinə görə, aqrar sığorta haqqına 50 faizlik dövlət dəstəyi sayəsində fermerlər cüzi məbləğ ödəməklə əkin sahələrini sığorta edə bilər­lər. Diqqətə çatdırılıb ki, aqrar sığorta əkin sahələrini təbiət hadisələri, dolu, qasırğa, fırtına, leysan yağışları, sel-subasma, yan­ğın, vəşhi heyvanların hücumu, 3-cü şəxs­lərin hərəkətərindən sığorta edir.

Ölkəmizdə aqrar sığortadan faydala­nan fermerlərin sayının getdikcə artdığını bildirən fond rəhbəri buna misal olaraq de­yib ki, 2022-ci ildə müxtəlif hadisələrdən zərər çəkən fermerlərə 2,4 milyon manat sığorta ödənişi edildiyi halda, ötən il bu rəqəm 4,4 milyon manata, cari ilin 7 ayın­da isə 3,3 milyon manata yüksəlib. Onun sözlərinə görə, ilin sonunda bu məbləğin daha yüksək olacağı gözlənilir.

Bildirilib ki, Şirvan–Salyan iqtisadi rayonunda indiyədək əkin sahələrinə dəy­miş zərərlə bağlı, ümumilikdə, 686 min manat, heyvandarlıq sığortası üzrə isə 96 min manat sığorta ödənişi edilib. Payızlıq taxıl mövsümünün yaxınlaşdığını xatırla­dan fond sədri fermerləri əkin sahələrini çoxsaylı risklərdən qorumağa və sığorta olunmağa çağırıb.

Tədbirdə sığorta haqları və sığorta ödə­nişləriin hesablanması, ayrı-ayrı məhsullar üzrə sığorta haqları, ödəniş prosesi barədə də məlumat verilib. Qeyd olunub ki, Sal­yanda 1000 manatlıq buğda və pambığın sığortalanması fermerə cəmi 7 manata, eyni məbləğdə arpa məhsulunun sığortası 9 manata, narın sığortası 8 manata, xur­manın sığortası isə 11 manata başa gəlir. Salyanda geniş yayılmış bostan bitkilərinə gəlincə isə, 1000 manatlıq pomidorun sı­ğortalanmasını 10 manata, eyni məbləğdə qarpızın sığorotalanmasını isə cəmi 11 manata təmin etmək mümkündür. Bunun­la yanaşı, əlavə vəsait ödəməklə məhsulu donvurmadan və dolu yağması nəticəsində görünüşünün korlanmasına görə ucuzlaş­masından da sığortalamaq olar. 

Ümumilikdə isə bu və digər məlu­matlar fermerlərin böyük marağına səbəb olub. Təsərrüfat sahiblərinin sığortanın əhatə etdiyi risklər, sığorta ödənişi prose­si, sığorta müqaviləsinin bağlanması və qüvvəyə minməsi, heyvandarlıq sığortası və sair hallarla bağlı çoxsaylı sualları da mütəxəssislər tərəfindən ətraflı cavablan­dırılıb. Eyni zamanda, femerlərə bildirilib ki, onlar sığorta müqaviləsinin olmasını və qüvvəyə minməsini Aqrar Sığorta Fondu­nun rəsmi internet səhifəsindəki “Şəhadət­naməni yoxla” bölməsindən dəqiqləşdirə, sığorta haqlarını isə qurumun saytındakı “Sığorta kalkulyatoru” vasitəsilə hesbala­ya bilərlər.

Tədbirdən sonra Salyan rayonunun bir sıra təsərrüfatlarına baş çəkən Aqrar Sığor­ta Fondunun sədri F. Sadıqov femerlərlə görüşüb, onların suallarını cavablandırıb.