İqtisadi Zonaların İnkişafı Agentliyinin idarəçiliyində olan Qaradağ Sənaye Parkının rezidenti “Bakı Gəmiqayırma Zavodu” MMC-nin istehsal həcmi artıb.
Qurumdan verilən məlumata görə, 2024-cü ilin birinci yarısında müəssisədə 25 milyon manatlıq iş görülüb. Bu, əvvəlki ilin eyni dövrü ilə müqayisədə 16,7 milyon manat və ya 3 dəfə çoxdur. Ötən müddətdə zavodda 722 nəfər daimi işlə təmin edilib. “Bakı Gəmiqayırma Zavodu” MMC-də Qaradağ Sənaye Parkında tətbiq edilmiş idxal əlavə dəyər vergisi və gömrük güzəştləri nəticəsində 2015-ci ildən indiyədək 73 milyon manatdan çox vəsaitə qənaət olunub.
Xatırladaq ki, müəssisə müasir tələblərə cavab verən müxtəlif təyinatlı gəmilərin tikintisi, təmiri və ümumilikdə, dəniz və mühəndislik işlərinin yerinə yetirilməsi istiqamətində fəaliyyət göstərir.
