Avropa Yenidənqurma və İnkişaf Bankının (AYİB) dəstəyi ilə reallaşdırılan “Qobustan” Günəş Elektrik Stansiyası üzrə elan edilmiş hərracda iştirakçılardan daxil olmuş təkliflərə baxılması, ixtisas uyğunluğunun müəyyənləşdirilməsi və qalibin seçilməsi məqsədilə yaradılmış komissiyanın üçüncü iclası keçirilib. 

Bərpa Olunan Enerji Mənbələri Döv­lət Agentliyinin direktoru Cavid Abdulla­yev ölkəmizdə ilk dəfə “yaşıl” enerji hər­racının keçirilməsi prosesi barədə ümumi məlumat verib. O, layihə çərçivəsində təkliflər sorğusu mərhələsinin tələblərinə uyğun olaraq bu ilin sentyabr ayında hər­racın təşkil ediləcəyi əraziyə (Bakı şəhəri, Qaradağ rayonu, Pirsaat qəsəbəsi ərazisin­də yerləşən 300,77 hektar sahə) iştirakçı şirkətlərlə birgə səfərin və layihə ilə bağ­lı konfransın nəzərdə tutulduğunu deyib. Eyni zamanda, konfransda layihə çərçi­vəsində müzakirələr aparılacaq və hərrac komissiyasının üzvləri, o cümlədən məs­ləhətçi şirkət nümayəndələri iştirakçıların suallarını cavablandıracaq.

Daha sonra hərrac komissiyasının sədri Kamran Hüseynov çıxış edərək təd­birlə bağlı ötən iclasdan sonrakı dövrdə görülmüş işlərə dair komissiya üzvlərinə ətraflı məlumat verib. O, hərracın ilk mər­hələsinin (ixtisas uyğunluğunun müəyyən­ləşdirilməsi) icra qrafikinə uyğun olaraq uğurla başa çatdığını və 8 şirkətin ixtisas tələblərinə uyğun hesab edilərək növbəti mərhələyə (təkliflər sorğusu) keçdiyini ic­las iştirakçılarının diqqətinə çatdırıb. Ko­missiya sədri təkliflər sorğusu mərhələsi üzrə ötən dövr ərzində şirkətlər tərəfindən layihəyə dair daxil olmuş müxtəlif sorğula­rın məsləhətçi şirkətin iştirakı ilə cavablan­dırıldığını vurğulayıb.

Görüşdə AYİB və “Synergy” məsləhət­çi şirkətinin nümayəndələri təkliflər sor­ğusu mərhələsi üzrə hərracda iştirak edən şirkətlərə təqdim edilmiş sənədlər və hər­racın təşkili üzrə icra qrafikinə dair ətraflı məlumat veriblər.

Sonda komissiya üzvləri layihə çərçi­vəsində qarşıda duran məsələlərə dair mü­zakirələr də aparıblar.