Özbəkistanın “TST Textile Group” MMC tərəfindən İmişli Aqroparkın ərazisində pambıq sahəsi salınacaq. Bu da ölkəmizdə pambıqçılığın inkişafında mühüm rol oynayacaq. Özbək şirkəti ilkin mərhələdə pambıq sahəsinin yaradılmasına 28,7 milyon manat investisiya yatıracaq. Bu barədə İqtisadi Zonaların İnkişafı Agentliyindən məlumat verilib.
Bildirilib ki, 2025-2029-cu illər ərzində şirkət tərəfindən pambıq emalı, iplik, toxuculuq və tikiş fabriklərinin, həmçinin pambıq yağı zavodunun qurulması nəzərdə tutulur. Pambıq emalı və yağ zavodları İmişli rayonu ərazisində yerləşən 5 min 826 hektar torpaq sahəsində, iplik, toxuculuq və tikiş fabrikləri isə Mingəçevir Sənaye Parkının ərazisində yaradılacaq. Layihə çərçivəsində xammaldan son məhsul istehsalına kimi proseslər həyata keçiriləcək ki, bu da klasterləşmənin qurulmasına təkan verəcək.
Qeyd edək ki, ümumi investisiya həcmi 92,5 milyon manat təşkil edən layihə çərçivəsində 1130 nəfərlik iş yerinin yaradılması planlaşdırılır. Layihənin həyata keçirilməsinə şəxsi vəsaitlə yanaşı, Azərbaycan–Özbəkistan İnvestisiya Fondu tərəfindən də maliyyə ayrılması nəzərdə tutulur. Beləliklə, layihənin həyata keçirilməsi ölkəmizdə pambıqçılıq sahəsində ilk dəfə olaraq Özbəkistan təcrübəsi əsasında klasterləşmənin formalaşmasına gətirib çıxaracaq.
Bütövlükdə, Özbəkistana məxsus “Tukımachı Sanoat Tekstıl” MMC Azərbaycanda yaradacağı 5 müəssisənin hesabına 10 il ərzində (2025-2034-cü illərdə) 648 milyon manat satış gəlirləri, 222 milyon manat isə vergiyəqədərki mənfəət əldə edəcəyini proqnozlaşdırır. Şirkətin həmtəsisçisi Abduvoris Yuldaşovun sözlərinə görə, investisiyanın geri qayıtması müddəti 5,5 il, layihədə xalis mənfəət marjası isə 34 faiz təşkil edir. “Bu layihənin hesabına regionlarda məşğulluq təmin ediləcək, əlava dəyər yükü olan iplik, qumaş, tikiş məhsulları ixrac olunacaq”, – deyə o əlavə edib.
