Kənd Təsərrüfatı Nazirliyinin məlumatına görə, bağların salınmasında nazirliyin Meyvəçilik və Çayçılıq Elmi-Tədqiqat İnstitutunun mütəxəssisləri Xorvatiya, Ukrayna və Böyük Britaniyadan olan həmkarları ilə birgə fəaliyyət göstərirlər.
Məlumatda qeyd edilir ki, fındıq bitkisinin super intensiv texnologiya əsasında becərilməsi tinglərin sıxlaşdırılmış əkini hesabına torpaqdan daha səmərəli istifadəyə imkan verir: “Bu texnologiya üzrə fındıq bağlarının salınmasında əsasən 3x0,6 metr və 3x0,7 metr əkin sxemlərindən istifadə olunur. Həmin sxemlər bir hektar sahəyə 4700-5500 ədəd fındıq tingi əkilməsinə və hektardan məhsuldarlığın 8-10 tona çatdırılmasına imkan yaradır”.
Bu məqsədlə ölkəmizdə ilk dəfə müasir fındıq tingliyi yaradılıb. Ölkəyə yeni fındıq sortları gətirilib. Yeni üsulla salınan fındıq bağlarında quruma faizi demək olar ki, sıfıra endirilib.
Quba və Zaqatalada “Fındıq bitkisinin becərilməsində müasir yanaşmalar” elmi-praktiki seminarlarda fermerlərə super intensiv texnologiya əsasında fındıq bağlarının salınmasına dair geniş məlumat verilib.
Azərbaycanda fındıq bağlarının ümumi sahəsi 2015-ci ilə nisbətən 47,7 min hektar artaraq 2021-ci ildə 80,4 min hektar təşkil edib. Ümumi məhsul istehsalı 67,6 min ton olmaqla, hektardan məhsuldarlıq 1,9 sentner artaraq 13,7 sentnerə çatıb.
Lakin ölkənin ayrı-ayrı bölgələrinin fındıqçılıq üzrə ixtisaslaşdırılmış təsərrüfatlarında müxtəlif kompleks aqrotexniki qulluq tədbirləri tətbiq etməklə 17-28 s/ha və daha çox məhsul əldə edilir. Meyvəçilik və Çayçılıq Elmi-Tədqiqat İnstitutunda fındıq bağlarının gübrələnməsi və cavanlaşdırılması üzrə aparılmış təcrübələrin nəticələri göstərir ki, məhsuldarlıq kəskin sürətdə artır.
XQ