Ulu öndər Heydər Əliyevin 100 illik yubileyi ilə bağlı olaraq “Azərenerji” ümummilli liderin şah əsərlərindən sayılan və 40 ildən artıq vaxt keçməsinə baxmayaraq hələ də Qafqazın ən böyük istilik elektrik stansiyası titulunu qoruyub saxlayan Mingəçevirdəki “Azərbaycan” İES-də geniş tədbir keçirib. Əvvəlcə “Azərenerji”, “Azərişıq” və Mingəçevir rayon rəhbərliyi ulu öndərin “Azərbaycan” İES-in həyətində ucaldılan abidəsinin önünə gül dəstələri qoyublar.
Sonra ümummilli liderin Azərbaycan elektroenergetika sahəsində həyata keçirdiyi misilsiz fəaliyyətinə həsr olunan sərgiyə baxış olub.
“Azərenerji”dən redaksiyamıza bildirilib ki, ulu öndərin təşəbbüsü ilə tikilən 2400 meqavatlıq “Azərbaycan” İES Prezident İlham Əliyevin sərəncamı ilə tam yenidən qurulub və tədbirin əsas hissəsi də yenidənqurmadan sonra yeni tikilən İdarəetmə Mərkəzinin akt zalında keçirilib. Əvvəlcə ümummilli liderin elektroenergetika sahəsində gördüyü işlərə dair “Azərenerji” tərəfindən hazırlanmış film nümayiş olunub.
“Heydər Əliyevin milli energetika siyasəti və müasir transformasiyalar” mövzusunda konfransda “Azərenerji” nümayəndələri, akademik və professorlar, Mingəçevir şəhər rəhbərliyi, Milli Məclisin deputatları, müharibə veteranları da çıxışlar edib və ulu öndərin həyata keçirdiyi uğurlu fəaliyyətindən danışıblar.
Tədbirin sonunda 1981-ci il oktyabrın 20-də “Azərbaycan” İES-in açılış mərasimində iştirak edən və elektroenergetika sahəsində səmərəli fəaliyyət göstərən “Azərenerji”nin bir qrup əməkdaşına xatirə plaketlər təqdim olunub. Eyni zamanda, qonaqlara ulu öndər Heydər Əliyevin təşəbbüsü ilə tikilən və Prezident İlham Əliyevin sərəncamı ilə yenidən qurulan “Azərbaycan” İES haqqındakı “Bərpa olunan miras” kitabı təqdim edilib.
“Xalq qəzeti”