Azərbaycan və Rusiya Şimal–Cənub beynəlxalq nəqliyyat dəhlizi çərçivəsində müvafiq infrastrukturun inkişafı istiqamətində əməkdaşlığa dair fikir mübadiləsi aparıb.
Bu barədə rəqəmsal inkişaf və nəqliyyat naziri Rəşad Nəbiyev özünün “Twitter” hesabında məlumat verib. Nazir daha sonra bildirib: “Rusiyaya səfər çərçivəsində bu ölkənin nəqliyyat naziri Vitali Savelyevlə görüşdük, ölkələrimiz arasında avtomobil nəqliyyatı, aviasiya və dəmir yolu daxil olmaqla nəqliyyat sahəsində əməkdaşlığın inkişafı məsələlərini müzakirə etdik”.
Rəqəmsal İnkişaf və Nəqliyyat Nazirliyinin bununla bağlı məlumatında qeyd olunur ki, tərəflər “Rusiya–Azərbaycan dövlət sərhədindən “Yaraq-Qazmalar” (Rusiya Federasiyası) – “Samur” (Azərbaycan Respublikası) buraxılış məntəqələri ərazisində Samur çayı üzərindən avtomobil körpüsünün və giriş yollarının istismarı və xidmətin göstərilməsi qaydaları haqqında Saziş” layihəsinin razılaşdırılması üçün müzakirələr aparıblar. Görüş zamanı, həmçinin hava nəqliyyatı sahəsində əlaqələrdən bəhs edilib, uçuşların və istiqamətlərin sayının artırılmasının vacibliyi vurğulanıb.
Eyni zamanda iki ölkə arasında dəmir yolu nəqliyyatı sahəsində, o cümlədən Şimal–Cənub Dəhlizi çərçivəsində dəmir yolu infrastrukturunun inkişafı istiqamətində əməkdaşlığın uğurla davam etdirildiyi qeyd olunub. Yeri gəlmişkən, ötən il adıçəkilən dəhlizlə dəmir yolu daşımalarının həcmi 481 min ton təşkil edib.
Görüşün sonunda Azərbaycan və Rusiya arasında nəqliyyat sahəsində əlaqələrin daha da inkişaf edəcəyinə əminlik ifadə olunub.
“Xalq qəzeti”