Slovakiyanın paytaxtı Bratislavada keçirilən cüdo üzrə gənclər arasında Avropa çempionatında fərdi mübarizələr başa çatıb.
Dünən – üçüncü yarış günündə Azərbaycanın 4 cüdoçusu tatamiyə çıxıb.
Davud Namazlı (100 kq), Ramazan Əhmədov (+100 kq) və Nigar Süleymanova (+78 kq) ilk görüşdə məğlub olaraq qitə birinciliyi ilə erkən vidalaşıblar.
90 kiloqram çəki dərəcəsində qüvvəsini sınayan Aslan Kotsoyev birinci görüşündə Macarıstan idmançısı Leventr Kissə ipponla qalib gələrək 1/8 finala vəsiqə qazanıb. Lakin idmançımız bu mərhələdə gürcüstanlı dünya çempionu Luka Cavaxişviliyə məğlub olaraq mübarizəni dayandırıb.
Beləliklə, cüdoçularımız Avropa çempionatını fərdi yarışlarda 2 qızıl, 1 bürünc medalla başa vurub.
Qabil YUSİFOĞLU
XQ
