Başa çatmaqda olan 2023-cü ildə görülən işlər müzakirə edilir, yeni hədəflər müəyyənləşdirilir. Təbii ki, Olimpiya idman növləri üzrə komandalarımız dördilliyin ən mühüm yarışı olan Paris Yay Olimpiya Oyunlarına lisenziya qazanmaq və bu nüfuzlu yarışda ölkəmizi layiqincə təmsil etməyi qarşıya əsas hədəflərdən biri kimi qoyublar.
Bu yazıda qadın güləşi üzrə komandamızın builki nəticələri, Olimpiya şanslarından söhbət açacağıq. Bəri başdan onu deyək ki, qadın pəhləvanlarımız Paris Olimpiadasına lisenziya yarışlarında güclərini sınasalar da, hələlik vəsiqə qazana bilməyiblər. Qadınlardan ibarət yığmamızın baş məşqçisi Semyon Çterev “XQ”yə müsahibəsində güləşçilərimizin Olimpiya şanslarından danışdı:
– Şanslar var və ondan düzgün istifadə etmək lazımdır. Əsas hədəf şübhəsiz, Olimpiya Oyunlarıdır. Yığmamızın lideri Mariya Stadnikin (52 kq) lisenziya qazanacağına əminəm. Komandamızın digər üzvlərindən 57 kiloqram çəkidə Jalə Əliyeva, Alyona Kolesnikin potensialını da xüsusi vurğulamaq istəyirəm. 68 kioqram çəkidə Elis Monolovanın da imkanları geniş idi. Onu da deyim ki, o, ötən olimpiadaya lisenziya götürmüşdü. Avropa çempionatının qalibi və dünya çempionatının mükafatçısıdır. Elis bir il bundan əvvəl zədəli idi. Almaniyalı həkim onun müalicəsi ilə məşğul olurdu. İndi tam formadadır. Ümid edirəm ki, gələcəkdə nəticələri yaxşı olacaq. Gültəkin Şirinova, İlona Dudyak Semkivə (53 kq) də inanırıq. Şübhəsiz, burada püşkatmanın nəticələri də rol oynayır.
Baş məşqçi bu il Avropa və dünya çempionatlarında qadın yığmamızın nəticələri ilə bağlı danışdı. Bildirdi ki, bu il yığmamız Avropa çempionatında yaxşı çıxış etdi. Mariya Stadnik qalib oldu, Jalə Əliyeva isə gümüş medal qazandı. Komandamızın digər 2 üzvü də mükafatçılar sırasına düşə bilərdi. Ümumi nəticəyə görə 6-cı olduq. Amma dünya çempionatındakı nəticələri qənaətbəxş hesab edə bilmərik:
– Dünya çempionatında Mariya medal və Olimpiadaya lisenziya qazana bilərdi. M.Stadnikin hazırlığı yüksək səviyyədə idi. O, 1/4 finalda ABŞ təmsilçisi Sara Ann Hildebrandta uduzduğu görüşdən əvvəlki iki qarşılaşmada çətinlik çəkmədən (10:0) qalib gəlmişdi. Jalə Əliyevanın da medal şansları böyük idi. Hər iki güləşçimizin rəqibləri növbəti mərhələdə uduzduqları üçün medal uğrunda mübarizə aparmaq şanslarını itirdilər.
Baş məşqçinin sözlərinə onu da əlavə edək ki, gənc güləşçimiz Jalə Əliyeva son 2 ildə sabit nəticələr qazanıb. Belə ki, ötən il U-20 Avropa çempionatının qalibi olub, 23 yaşadək gənclərin qitə çempionatında gümüş, İslam Həmrəyliyi Oyunlarında bürünc medallar qazanıb. Bu il isə böyüklər arasında Avropa çempionatında II yeri tutmaqla yanaşı, 23 yaşadək qızlar arasında Avropa çempionatında (bürünc) və dünya çempionatlarında (gümüş) mükafatçılar sırasına düşməyi bacarıb. Daha bir istedadlı güləşçi – Gültəkin Şirinova bu il 20 yaşadək qızların dünya birinciliyində bürünc, həmin yaş qrupunda Avropa birinciliyində gümüş medala sahib olub. Ümumiyyətlə, qızlar arasında müxtəlif yaş qrupları üzrə dünya, Avropa birinciliklərində qızlarımız parlaq nailiyyətlər qazanıblar ki, bu da gələcəkdə Olimpiya ehtiyatları üçün əsaslı zəmin yaradır.
Semyon Çterev güləşçilərin növbəti lisenziya turnirlərinə hazırlığından da danışdı:
– Gələn ilin fevralında Buxarestdə Avropa çempionatı keçiriləcək. Komandamızın maksimum nəticə göstərməsinə çalışacağıq. Olimpiadaya lisenziya xarakteri daşıyan Avropa təsnifat turniri aprel ayında Bakıda olacaq. Bir aydan sonra isə Türkiyədə dünya təsnifat yarışında iştirak edəcəyik. Bu yarışların hər biri mühüm əhəmiyyət daşıyır. Düşünürəm ki, güləşçilərimiz ən azı 1, maksimum 3-4 lisenziya qazana biləcəklər. Bunun üçün var gücümüzlə hazırlığımızı davam etdiririk. Çalışacağıq ki, qarşıya qoyduğumuz hədəfə nail olaq.
Leyla QURBANOVA
XQ
