Azərbaycan idmançıları Avropa arenasında daha bir uğurlu çıxışla yadda qalıblar. Monteneqronun Budva şəhərində 22 yaşadək (U-22) boksçular arasında keçirilən qitə çempionatında millimiz 1 qızıl, 1 gümüş və 3 bürünc mükafata sahib olub. 

Yığmamıza qızıl medalı qazandıran Nicat Hüseynov (51 kq) öz çəki dərə­cəsində ən perspektivli dəri əlcək usta­larındandır. İdmançımız ötən il Xorva­tiyada keçirilən analoji yarışda da fəxri kürsünün ən yüksək pilləsində qərarlaş­mışdı. 

İdmançı Azərbaycan Boks Federa­siyasının mətbuat xidmətinə açıqlama­sında ikinci dəfə Avropa çempionu adını qazandığı və titulunu qoruduğu üçün məmnun olduğunu bildirib. Çempiona­ta yollanarkən əsas hədəfinin qızıl me­dal olduğunu söyləyən 19 yaşlı boksçu ən çətin döyüşün yarımfinalda olduğu­nu deyib. Bütün görüşlərini hakimlərin yekdil qərarı ilə – 5:0 hesablı qələbə ilə başa vuran rinq ustası bildirib ki, tür­kiyəli Semih Gümüşlə qarşılaşmada bir anlıq həyəcan keçirsə də, bu, ona ye­kunda inamlı qələbə qazanmağa mane olmayıb. 

Avropa çempionu finalda ermə­nistanlı Rudolf Qarboyanla görüşün­dən də danışıb: 

– Döyüşə rahat çıxdım. Püşkdən sonra yarımqruplara baxdıqda final­da erməni ilə qarşılaşacağımı bildim. Onu da qeyd edim ki, rəqibim zəif yarımqrupda yer almışdı. İlk görüşlərdən özümü finalda gördüyümdən və buna qəti inandığım üçün həmin qarşılaşma­ya psixoloji cəhətdən də tam hazır idim. Rinqə yalnız qələbə üçün çıxmışdım və onu qazandım. Belə bir nüfuzlu yarışda Azərbaycan himnini səsləndirdiyim üçün çox sevinirəm. 

Kişilərdən ibarət yığma komanda­nın böyük məşqçisi Nəriman Abdul­layev “XQ”yə müsahibəsində qeyd etdi ki, 22 yaşadək gənclərdən ibarət yığmanın Avropa çempionatında əldə etdiyi nailiyyət təqdiredicidir: 

– Gənc boksçularımızın qitə yarı­şında yaxşı çıxışı gələcək uğurlar üçün əsaslı zəmin yaradır. Yığmada yer alan Nicat Hüseynov ikinci dəfə Avropa çem­pionluğunu qazanıb. O, bütün görüşlə­rində inamla çıxış etdi, rəqibi üçün heç bir şans saxlamadı. 

Yalnız finalda məğlub olan yığma üzvü Əzrək Bəbirov (57 kq) da yaxşı çıxış etdi. İndiyədək bir sıra beynəlxalq turnirlərin qalib və mükafatçısı olan boksçu bu yarışda uğurla çıxış edərək gümüş medal qazanıb. Murad Allahver­diyev (80 kq) yığmamızın birinci nöm­rəsidir, respublika çempionudur. Keçən il U-22-də parlaq çıxış etsə də, hakim ədalətsizliyi səbəbindən medal qazana bilmədi. İdmançılarımızın mükafatçı­lar sırasına düşməsi onun potensialını göstərir. Respublika çempionu Tural Sarıyev (48 kq) Budvada bürünc medal qazanmaqla yığmada yerini daha da möhkəmlətdi. O, ötənilki Avropa çempi­onatında yer tuta bilməmişdi. Budəfəki nəticəsi bir daha göstərir ki, öz üzərində çalışır və inkişaf var. Düşünürük ki, o da yığma komandada Olimpiya lisenziyası qazana bilər. 

Qadınlardan ibarət yığma koman­danın baş məşqçisi Yadigar Məm­mədov gənclər arasında Marjona Savriyevanın (50 kq) fərqlənməsinin sevindirici hal olduğunu bildirdi:

– Sevindirici haldır ki, Azərbaycan boksunun inkişafına qızlarımız da öz töhfələrini verirlər. Yarışda qızlar arasın­da 3 boksçumuz mübarizə aparırdı. On­lardan Marjona Savriyeva bürünc medal qazandı. Birinci döyüşdə Belarus id­mançısına qalib gələn boksçumuz finala gedən yolda rusiyalı Arina Vostrikova ilə bərabər döyüş nümayiş etdirsə də, son­da xal hesabı ilə məğlub oldu. M.Sav­riyeva U-22-də yığmanın bir nömrəsidir. Qadınlar arasında isə Avropa çempio­natının bürünc mükafatçısı Anaxanım İsmayılova bir nömrə hesab olunur. Bu yaxında keçiriləcək yarışda ölkə yığma­sının 1-2-3-cü dərəcəli idmançıları bəlli olacaq. 

Leyla QURBANOVA
XQ