Premyer Liqanın VII turunda keçirilən oyunlarda qeydə alınan neqativ hallara görə AFFA İntizam Komitəsi klubları cəzalandırıb.
“Sumqayıt”ın məşqçisi Mübariz Orucov “Turan Tovuz”la görüşün 90+3-cü dəqiqəsində meydana daxil olaraq hakimin qərarına etiraz etdiyinə görə birbaşa qırmızı vərəqə alıb, 1-i şərti olmaqla 2 oyunluq cəzalandırılıb. Klubu 1500 manat cərimə ödəyəcək. Mütəxəssis isə 3 ay sınaqda olacaq.
4 futbolçusu “Sabah”la səfər qarşılaşmasında sarı vərəqə alan “Kəpəz” 700 manat cərimələnib. “Sabah” isə Təcili Tibbi Yardım avtomobilinin görüşə təyin olunan vaxtdan gec gəldiyinə görə 1000 manat cərimə ödəyəcək.
“Səbail” də 800 manat cərimə verməli olacaq. Buna komandanın “Araz-Naxçıvan”la oyunu başa çatdıqdan sonra meydana kənar şəxsin girməsi səbəb olub.
Leyla SABİRQIZI
XQ
