“Xalq qəzeti” redaksiyasında Xəzər dənizinin problemləri mövzusunda “dəyirmi masa”
Xəzər dənizinin problemləri ilə bağlı redaksiyamızda təşkil olunan “dəyirmi masa”da qonaqlarımız Bakı Dövlət Universiteti coğrafi ekologiya kafedrasının əməkdaşı, coğrafiya elmləri doktoru, professor Şövqi Göyçayski, ETN Coğrafiya İnstitutunun ekocoğrafiya şöbəsinin müdiri, coğrafiya elmləri doktoru, dosent Ənvər Əliyev, həmin institutun şöbə müdiri, coğrafiya elmləri doktoru, professor Əmir Əliyev, “İqlim” Tədqiqat və Məsləhət Mərkəzinin direktoru, coğrafiya elmləri üzrə fəlsəfə doktoru Mirzəxan Mənsimov, Xəzər Universiteti Ekoloji Tədqiqatlar Mərkəzinin direktoru, coğrafiya üzrə fəlsəfə doktoru, dosent, Ekologiya Nazirliyi yanında İctimai şuranın üzvü Rövşən Abbasov və ETN Coğrafiya İnstitutunun şöbə müdiri, coğrafiya elmləri doktoru Səid Səfərov idilər.
“Xalq qəzeti”nin baş redaktoru Əflatun AMAŞOV qonaqları salamlayaraq bildirdi ki, Azərbaycanda mövcud ekoloji sistemlərin qorunmasına və təbii ehtiyatlardan səmərəli istifadə edilməsinə böyük diqqət yetirilir. Sosial-iqtisadi inkişafın ekoloji baxımdan davamlı olması üçün iqtisadi fəaliyyət zamanı meydana çıxan ciddi ekoloji problemlərin aradan qaldırılmasına, onların ətraf mühitə mənfi təsirinin minimuma endirilməsinə xüsusi önəm verilir və ekoloji vəziyyətin yaxşılaşdırılmasına yönələn layihələr, paytaxt ətrafındakı neft və çirkab suları ilə çirklənən göllərin təmizlənməsi, qurudulması istiqamətdə davamlı layihələr həyata keçirilir.
Sadalanan ekoloji problemlərin böyük bir hissəsi aradan qaldırılsa da, hələ də bu sahədə bir sıra çatışmazlıqlar nəzərə çarpır. Burada Xəzərin, sahilyanı ərazilərin çirklənməsi, sularda biomüxtəlifliyin qorunması ilə bağlı problemlər ciddi narahatlıq doğurur. Belə ki, hazırda dənizin çirklənməsi daha çox diqqət çəkir ki, bunun da ən əsas səbəbi qurudan daxil olan və ya quruda həyata keçirilən fəaliyyət nəticəsində yaranan çirklənmə göstərilir.
Əflatun AMAŞOV daha sonra dedi:
– Xəzər dənizinə ən böyük tullantı suları çaylar vasitəsilə daxil olur, eyni zamanda, sahil ərazilərində təsərrüfat fəaliyyətindən, məişət tullantıları nəticə-sində çirklənmə baş verir. Məsələn, Ermənistanın bu gün də mövcud sahədəki neqativ fəaliyyəti barədə mətbuatda mütəmadi materiallar dərc edilir. Bundan çıxış yolu isə fikrimcə, sahilyanı ölkələrin birgə səyi ilə təmizlənməmiş tullantı sularının Xəzər dənizinə axıdılmasının qar-şısının alınması və tullantı suların təmiz-ləyici qurğularda müvafiq standartlara uyğun təmizlənməsinin təmin edilməsidir.
Baş redaktor qonaqları işgüzar, səmərəli müzakirəyə dəvət edərək vurğuladı ki, redaksiyanın fəaliyyətində ölkənin sosial-iqtisadi, ictimai-siyasi həyatının bütün sahələri kimi, ekoloji layihələrin reallaşdırılması, eləcə də Xəzər dənizi-nin problemləri ilə bağlı ayrıca rubrika ilə məqalələrin dərc edilməsi prioritet istiqamətdir. Bugünkü “dəyirmi masa” da həmin silsilənin, bir növ, davamıdır.
* * *
Sual: – Xəzər dənizi problemləri içərisində səviyyə tərəddüdü ilə yanaşı, dəniz sularının çirklənməsi və bununla əlaqədar ekoloji şəraitin korlanması son dövrün ən mühüm problemidir. Bu barədə nə deyə bilərsiniz?
Şövqi GÖYÇAYSKİ, Bakı Dövlət Universitetinin coğrafi ekologiya kafedrasının professoru:
– Əflatun müəllim, müxtəlif mövzular ətrafında keçirilən “dəyirmi masa” ənənəsini davam etdirdiyiniz üçün Sizə dərin təşəkkürümü bildirirəm. Çox illər əvvəl bu qəzetin Bakı Dövlət Universitetində yaradılan Elmi-İctimai Birliklə birgə təşkil etdiyi və elmi-tədqiqat institutları, həmçinin müxtəlif dövlət qurumları nümayəndələrinin də qoşulduğu belə tədbirlərdə iştirak etmişəm. Yeri gəlmişkən, həmin “dəyirmi masa”lardan birində Azərbaycan şəhərlərinin içməli su probleminin həlli araşdırıldıqdan sonra yekun müddəalar Nazirlər Kabinetinə təqdim edildi. Hökumətin 1991-ci ildə sözügedən məsələ ilə əlaqədar keçirilən iclasında isə redaksiyanın mövcud problemlə bağlı tezis-müddəalarının 5-i nəzərə alınaraq ümumi yekun sənədə əlavə olundu. Beləliklə, yeraltı içməli suların bir şəbəkədə toplanaraq əhaliyə paylanılması o vaxtkı variantlardan biri olaraq “Kommunist”, indiki “Xalq qəzeti” vasitəsilə ictimaiyyətə təqdim edildi. Ümummilli lider Azərbaycana rəhbərlik etdiyi dövrdə içməli su problemi daha optimal variantlarda həll edildi.
Bugünkü “dəyirmi masa”da müzakirə ediləcək mövzu da aktuallığı ilə diqqət çəkir. Təqdim olunan suallarda Xəzərdə su səviyyəsinin tərəddüdü, sahil ərazilərinin çirklənməsi, sularda biomüxtəlifliyin qorunması kimi günümüzün çağırışları ilə səsləşən önəmli məsələlər öz əksini tapır.
Xəzər dənizinin səviyyə tərəddüdü ilə bağlı təfsilatlara varmayacağam. Çünki bugünkü tədbirimizdə bu sahə ilə məşğul olan mütəxəssislər iştirak edirlər. Onlar bu barədə ətraflı məlumat verəcəklər. Mən bir faktın üzərində dayanmaq istəyirəm. Son illər Xəzər dənizinin çirklənməsi ilə bağlı narahatlıqlar getdikcə artır. Bu barədə çox yazılır, çox danışılır. Qeyd etmək istəyirəm ki, Xəzər sahilyanı ölkələr, onun məcrasını təşkil edən çaylar vasitəsilə də çirklənir. Bu zaman mühüm bir məsələ unudulur. Həmin məsələ ondan ibarətdir ki, Xəzərin su təminatının 80 faizindən bir qədər az, bir qədər çox hissəsi Volqa çayının payına düşür. Üstəlik də, qeyd olunur ki, Xəzər həm təbii, həm də antropogen yolla çirklənir. Təbii yolla çirklənmədə, əsasən, iqlim dəyişmələrinə istinad olunur. Bu barədə də çox yazılır. Antropogen yolla çirklənməyə gəldikdə isə, bunun izahı yoxdur. Təkcə o məlumdur ki, antropogen təsir insan fəaliyyəti nəticəsində yaranır. Bunun isə təhlili, ətraflı aparılmır. Əgər antropogen təsirdən söhbət gedirsə, bütün 1,4 milyon kvadratkilometr Volqanın hövzəsi antropogen təsir altındadır.
Bununla yanaşı, bütün Xəzəryanı ölkələrdən axan çaylar da belə bir təsirə məruz qalır. Hesab edirəm ki, Xəzər dənizinin hansı səviyyədə antropogen təsirlərə məruz qalması dəqiqləşdirilməlidir. Ondan sonra isə biz çirklənmənin təbii fonunu müəyyənləşdirə bilərik.
Hazırda Volqa çayının üzərində 9 iri su anbarı var. İlk dəfə olaraq 1950-ci illərdə su anbarları inşa olunarkən ekologiya, iqlim dəyişmələri barədə fikirləşən yox idi. Anbarlar tikilərkən çay yataqları 15–20 dəfə və daha çox genişləndirildi. O dövrdə iqlim indikindən fərqli idi, istilər də bu səviyyədə deyildi. İstiləşmə ilə əlaqədar Xəzərdə, eləcə də bütün hövzə çaylarında buxarlanma xeyli artıb.
Xəzərə daha çox su gətirən Volqa çayında suyun azalması da, onun çirklənmə səviyyəsi də aydın hiss olunur. Bu, o deməkdir ki, Xəzərin suyunun azalmasında və onun çirklənməsində Volqa çayının təsiri daha böyükdür. Çünki əvvəla, çay Rusiyanın 4 iqtisadi rayonundan keçir və həmin ərazilərdən tullantı suları Volqaya axıdılır. Hesablamalara əsasən, hər il Xəzərə daxil olan 40–45 kubkilometr çirkab suyun 60 faizi bu çayın payına düşür. İkincisi isə, ötən əsrin 50-ci illərində qonşu ölkənin tikdiyi bir neçə nəhəng su anbarı Volqanın yataqlarını genişləndirir və nəticədə, bu, Xəzərin səviyyəsindəki tərəddüdlərə təsir göstərir.
Ənvər ƏLİYEV, ETN Coğrafiya İnstitutunun şöbə müdiri, coğrafiya elmləri doktoru, dosent:
– Xəzər 200 milyon il bundan əvvəl əmələ gəlib. Dənizin səviyyə sərhədi elə özünün yaşı qədərdir. Səviyyə amplidudasının dəyişməsi isə 30–50 ildən bir dövrə təsadüf edir. İndi Xəzər enmə səviyyəsindədir. Sovet dövründə dənizin səviyyəsinin enmə problemini şimal çayları suyunun Xəzərə axıdılması hesabına həll etmək qərara alındı. Onun səviyyəsinin azalma və artması iki səbəblə – iqlim və tektonik hadisələrlə əlaqələndirilir. İndiki halda dənizin səviyyəsinin son 10 ildə 114 santimetr aşağı düşməsi, hələlik, Xəzəryanı ölkələrin heç birini təşvişə salmayıb, çünki bu, indilikdə qorxulu hədd deyil. Suyun səviyyəsinin bugünkü qədər azalması fonunda yem, qida azalması ilə yanaşı, buxarlanma səthi də çoxalır. Bu vəziyyət balıqların sayının azalmasına, balıqçılığa da ziyan vurur.
Xəzərin səviyyə tərəddüdü daim müzakirə mövzusu olub. Ümumiyyətlə, bu məsələ ilə bağlı müxtəlif fikirlərin səsləndirilməsi sözügedən dənizin yarandığı zamanlardan mövcuddur. Yəni Xəzərdə suyun səviyyəsinin müəyyən vaxtlarda aşağı və yaxud yuxarı olması adi haldır.
Xəzərdə enmə-qalxma davam etməkdədir. Bu, qeyd etdiyim kimi, xarakterikdir. Düzdür, bu məsələ fərqli şəkildə qiymətləndirilir. Xəzərin tarixində onun ən təlatümlü səviyyəyə enməsi 1970-ci illərdə – sovet dönəmində olub. O zaman Türkmənistandakı Qaraboğazgöl körfəzi də bağlandı. Bu körfəz vasitəsilə buxarlanma nəticəsində texniki duzlar meydanagəldi. Bundan əlavə, şimal çaylarının da istiqamətinin Xəzərə yönəldilməsi planı var idi. Sonralar suyun səviyyəsi yenidən qalxdığı üçün bu plan reallaşmadı.
Ötən əsrin 70-ci illərində Xəzərdə suyun səviyyəsinin təkrar qalxması da müəyyən problemlər yaratmışdı. Məsələn, çox adam yəqin ki, yaxşı xatırlayır: Cənub bölgəsində dənizin yaxınlığından keçən dəmiryol xəttinin müəyyən bir hissəsi suyun altında qalmışdı. Bundan başqa, Xəzərin sahilində xeyli əkin sahələri, o cümlədən heyvandarlıq üçün uyğun ərazilər də belə bir təhlükə ilə üzləşmişdi.
Hazırda Xəzər dənizində suyun səviyyəsinin enmə prosesi nəzərə çarpır. Bu, müxtəlif amillərlə əsaslandırılır. Eyni zamanda, prosesin hələ nə qədər davam edəcəyi bilinmir.
Əmir ƏLİYEV, ETN Coğrafiya İnstitutunun şöbə müdiri, coğrafiya elmləri doktoru, professor:
– Müasir dövrdə Xəzər dənizinin ən böyük problemi onun səviyyəsinin dəyişməsi ilə bağlıdır. Bunun da əsas səbəbi qapalı su hövzəsi olması ilə əlaqədardır. Yəni okeanla birbaşa heç bir əlaqəsi yoxdur. Ona görə də Xəzərin səviyyəsinin dəyişməsini birbaşa iqlimlə əlaqələndirmək lazımdır. Əbəs yerə deməyiblər ki, Xəzərin səviyyəsinin dəyişməsi iqlimin indikatorudur. Çünki regionda baş verən iqlim dəyişiklikləri birbaşa Xəzər dənizinə təsir göstərir.
Hazırda Xəzərə 3,5 milyon kvadratmetrlik ümumi hövzədən sular daxil olur. Dənizi qidalandıran suların 80 faizi çaylardan gəlir. Onun da elə 80 faizi şimal istiqamətindən axan Volqa və Ural çaylarının payına düşür. Xəzərin səviyyəsini dəyişdirən də məhz onun su balansıdır. Su balansı dedikdə, gələn və xaric olan sular nəzərdə tutulur. Xəzər dənizinin dünya okeanı ilə heç bir əlaqəsi olmadığı üçün buradan xaric olan suların hamısı buxarlanma hesabına baş verir. Dənizə gələn və buxarlanan suların arasında tarazlığın pozulması, yəni birinin artması, digərinin azalması səviyyə tərəddüdünə gətirib çıxarır. Bu proses tarix boyu müşahidə olunub. Məsələn, bizdə olan məlumata görə, son 4 min il ərzində Xəzərin səviyyəsində müəyyən dəyişmələr baş verib. Yəni proses nəticəsində 250 il azalma, 250 il isə əksinə, çoxalma qeydə alınıb. Yeri gəlmişkən, Xəzərin səviyyəsi haqqında sonuncu instrumental müşahidələr 1837-ci ildə Bakıda aparılan stoptan ölçmələrdir. Bu məlumatların hamısı institutumuzda qorunub saxlanılır. Həmin məlumatlardan o da aydın olur ki, tarix boyu Xəzərin səviyyəsində baş verən əsrlik dəyişmələrlə bərabər, 30 illik dəyişmələr də qeydə alınıb. Bu dəyişmələr isə Günəşdə baş verən proseslərlə əlaqədardır. Çünki Günəşdə müxtəlif dövrlərdə aktivlik baş verir. Bu proses də 11, 22 və 35 il ərzində davam edə bilir. O ki, qaldı dənizin səviyyəsinin qalxıb enməsinə, qeyd etmək istəyirəm ki, son 200 ildə burada səviyyə tərəddüdünün amplitudu, əsasən, 3–5 metr arasında dəyişib.
Xəzər dənizinin səviyyəsinin enməsinin başlıca səbəbi, ilk növbədə, dənizə daxil olan suların azalması ilə bağlıdır. Belə ki, aparılan müşahidələr nəticəsində müəyyən olunub ki, son illər Xəzər dənizinin əsas hövzəsi olan Volqa çayının suyu, təxminən, 30 faiz azalıb. Məlum olduğu kimi, son illərdə Xəzərin səviyyəsi iki dəfə böyük dəyişikliyə məruz qalıb. 1930-cu ildə başlayan proses 1977-ci ilədək davam edib və bunun da nəticəsində dənizin səviyyəsi 3 metr aşağı düşüb. 1977-ci ildən isə proses əks istiqamətdə davam edib. Bunun da nəticəsində Xəzərin səviyyəsi kəskin qalxmağa başlayıb. Beləlikə, 1995-ci ildə suyun səviyyəsində artıq 2,5 metrlik artım qeydə alınıb.
Ötən əsrin sonlarından etibarən isə Xəzər yenidən geri çəkilməyə başlayıb. Hazırda bu proses sürətlə davam edir. Artıq dənizin səviyyəsi yenidən 2 metr düşüb. Bu da son hədd deyil. Müşahidələr göstərir ki, bu proses yenə də 30 il müddətinə davam edəcək. Onu da deyim ki, 1997-ci ildə Xəzərin səviyyəsi indikindən 60 santimetr aşağı olub. Göründüyü kimi, bu məsələdə ciddi təşvişə əsas yoxdur. Çünki Xəzər canlı orqanizmdir. Onun səviyyəsi enə də, qalxa da bilər. Bəziləri iddia edirlər ki, dənizin səviyyəsi 10–18 metr düşə bilər. Bu, reallığı əks etdirmir. Xəzərin səviyyəsinin belə bir dəyişikliyə məruz qala bilməsi qətiyyən mümkün deyil.
Xəzər dənizi çox maraqlı quruluşa, relyefə malikdir. Sanki dəniz iki fincanı xatırladır. Onun biri orta Xəzərdə, digəri isə cənubda yerləşir. Onların dərinliyi müvafiq olaraq 800–1000 metr təşkil edir. Şimalda isə dərinlik 5 metrdir. Xəzərə çoxlu suyun daxil olması ilə əlaqədar həmin fincanlar dolur. Bu zaman dənizin qərbdən şərqə doğru, təqribən, 10–15dərəcə meyilli olması səbəbindən bu suların hamısı şərq sahillərinə doğru istiqamət alır. Burada güclü buxarlanma səbəbindən dənizin səviyyəsi çox qalxa bilmir.
Mirzəxan MƏNSİMOV, “İqlim” Təd-qiqat və Məsləhət Mərkəzinin direktoru, coğrafiya elmləri üzrə fəlsəfə doktoru:
– Xəzərin tərəddüdü məsələsində Əmir müəllimlə tam razıyam. Xəzər dənizinin sanki öz qanunauyğunluqları var. Elə bir vəziyyət yaranacaq ki, dənizə gələn sularla buxarlanma arasında bir bərabərlik yaranacaq. Ona görə də düşünürəm ki, dənizin səviyyəsinin 18 metrədək enəcəyi ilə bağlı söylənilənlərin heç bir əsası yoxdur. Dənizin bu səviyyədə enməsi üçün Volqa çayının quruması şərtilə, ən azı, 200 il vaxt lazımdır. Bu da mümkün olan məsələ deyil.
Son zamanlar Xəzər sutoplayıcı hövzəsində–Volqa, Kür və Ural çaylarında azalma baş verir ki, bu da dənizin enməsinə səbəb olub. Əgər bu azalma baş verməsəydi, Xəzərin səviyyəsi indikindən 1–2 metr yüksək olardı. Ancaq hər bir halda su istifadə olunmalıdır, insanlar yaşamalıdır, ölkələr inkişaf etməlidir. Bu, təbiidir. Ancaq sudan qənaətlə istifadə, təkrar suların təmizlənərək yenidən istifadə məsələləri getdikcə aktuallıq kəsb edir.
Bu gün Xəzərin ekoloji vəziyyəti keçən əsrin 70-ci illəri ilə müqayisədə elə də acınacaqlı deyil. Ötən müddətdə həm konvensiya qəbul edilib, həm də texnologiyalar dəyişib. Əvvəllər bizim regionda dənizi, əsasən, neft çirkləndirirdi. Həcm-cə isə Xəzərə ən böyük çirkləndiricilər Volqa çayından daxil olurdu. Vaxtilə ölü çay hesab olunan Ural da indi ən təmiz su mənbələrindən sayılır. Göründüyü kimi, məsələ o qədər də kəskin deyil. Şübhəsiz ki, suyun səviyyəsi artanda ekoloji vəziyyət daha yaxşı olur. Çünki suyun özünü təmizləmə prosesi sürətlənir. İndi bu sahədə iki əsas problem var. Birincisi, Xəzər dənizinin səviyyə tərəddüdü ilə bağlıdır. Digər problem ondan ibarətdir ki, biz Xəzər dənizi ilə bağlı əvvəlki mövqeyimizi itirmişik. Yəni Xəzərin tədqiqi, onun araşdırılması məsələsində, düşünürəm ki, Türkmənistan istisna olmaqla, bütün sahilyanı dövlətlərdən geridəyik. İran da bu məsələdə bizi üstələyib. Qazaxıstanda və Rusiyada bu sahədə geniş tədqiqatlar, çox yaxşı araşdırmalar aparılır, sanballı məqalələr yazılır.
İndi qlobal baxanda Xəzər dənizinin səviyyəsinin tərəddüdünü yumşaltmaq üçün sovet vaxtında çox gözəl bir ideya var idi. Həmin ideyaya görə, Orta Asiya respublikalarının və Qafqazın su çatışmazlığı problemi həll edilməli idi. Yeri gəlmişkən, sovet dövründə layihəçilər və tədqiqatçılar bununla bağlı 50 cilddən ibarət sənəd hazırlamışdılar. Mixail Qorbaçov da Stavropol diyarının birinci katibi olanda bu layihəni bəyənmişdi. Hətta 1984-cü ildə bu məsələnin həlli ilə bağlı qərar da qəbul olunmuşdu. Təəssüf ki, Mixail Qorbaçovun ölkəyə rəhbərliyi dövründə məsələ unuduldu və 1986-cı ildə bütün işlər dayandırıldı. Təklif edərdim ki, bu məsələ yenidən gündəmə gətirilsin.
Hazırda əhali artımı, ölkələrdə sənayenin inkişafı ilə əlaqədar suya tələbat da getdikcə çoxalır. Yəni tələbat həmişə olacaq. Suyu götürüb ondan istifadə etməklə biz, həm də onu tənzimləyirik. Yəni çaylardan suyu götürmək dənizin səviyyəsinə təsir edir. Bu yolla Xəzərin səviyyəsini tənzimləmək mümkündür. Düşünürəm ki, Xəzəryanı ölkələr bu vacib məsələni birlikdə müzakirə etməlidirlər.
Səid SƏFƏROV, ETN Coğrafiya İnstitutunun şöbə müdiri, coğrafiya elmləri doktoru:
– Dünya okeanı ilə birbaşa əlaqəsi olmadığından Xəzərin səviyyəsi daim tərəddüdlərə məruz qalıb. Son minillikdə dənizin ən aşağı səviyyəsi X əsrdə olub ki, həmin zaman Xəzər okean səviyyəsindən 35 metr aşağı imiş. Ən yuxarı səviyyə (okean səviyyəsindən 22 metr aşağı) isə XIV və XVIII əsrlərdə qeydə alınıb. Sonrakı yüzilliklərdə dənizin səviyyəsi artsa da, əsrlik səviyyə tərəddüdlərinin amplitudu 2–4 metr diapazonunda dəyişib. Beləliklə, bütün zamanlarda Xəzərin səviyyəsində enmə və qalxma prosesləri diqqət çəkib. Ümumiyyətlə, dənizin səviyyəsi özünəməxsus uzunmüddətli dəyişmə periodunda nəzərə çarpıb.
XX əsrdə dənizin səviyyə dəyişmələri 2 dəfə kəskin xarakter alıb. 1930-cu ildən 1977-ci illərə qədər müddətdə Xəzərin səviyyəsi 3 metr aşağı düşərək son 400 ilin mütləq minimumuna (-29 metr) çatıb. Lakin 1977-ci ildən səviyyə kəskin şəkildə qalxmağa başlayıb. 1995-ciilə qədər bu artım 2,5 metr təşkil edib. Sonrakı dövrdə dənizin səviyyəsi kəskin tərəddüdlərə məruz qalmasa da, səviyyə hər halda nəzərəçarpacaq dərəcədə azalmağa doğru gedir.
Kəskin səviyyə dəyişmələri Xəzəryanı ölkələrin iqtisadiyyatına və ekologiyasına ciddi təsir göstərdiyindən bu dəyişmələrin uzun müddət üçün qabaqcadan proqnozlaşdırılması mühüm önəm daşıyır. Lakin təəssüf ki, indiyə kimi dəniz səviyyəsi tərəddüdlərini əvvəlcədən uzun müddət üçün proqnozlaşdırmağa imkan verən etibarlı metodlar mövcud deyil. Əksər hallarda bu haqda verilən proqnozlar dəyişir. Məsələn, 1930–1977-ci illərdə dənizin səviyyəsi azalarkən əksər alim və mütəxəssislər səviyyənin düşməsinin gələcəkdə də davam edəcəyini proqnozlaşdırırdılar. Keçən əsrin 70-ci illərində alimlərin Xəzərin səviyyəsinin kəskin aşağı düşməkdə davam edəcəyi ilə bağlı bədbin proqnozlar səbəbindən, hətta keçmiş Sovetlər İttifaqında şimala axan Şimali Dvina və Peçora çaylarının istiqamətinin dəyişdirilərək Volqa çayına, oradan isə Xəzərə axıdılması üçün layihələr işlənilirdi. Lakin 1977-ci ildən dəniz səviyyəsinin kəskin qalxmağa başlaması ilə bu layihələr öz aktuallığını itirdi.
1977-ci ildən sonra dəniz səviyyəsinin 1995-ci ilə qədər kəskin artdığı müddətdə əksər alimlər tərəfindən səviyyənin gələcəkdə də yüksəlməkdə davam edəcəyi proqnozlaşdırılırdı. 1995-ci ildə səviyyə artımı dayansa da, son 10–15 ildə yenidən nəzərəçarpacaq azalma müşahidə edildi. Bu da müxtəlif alimlər tərəfindən əsrin sonunadək Xəzərin səviyyəsinin fəlakətli dərəcədə aşağı düşəcəyi haqda bədbin proqnozların verilməsi ilə müşayiət olundu. Bu baxımdan alman və holland alimlərinin “Nature Communications Earth & Environment” jurnalında dərc olunmuş məqalədə verdikləri proqnoz daha qorxuludur. Belə ki, onlar müxtəlif ssenarilərə əsasən, XXI əsrin sonunadək Xəzərin səviyyəsinin 9–18 metr aşağı düşəcəyini proqnozlaşdırırlar. Bundan əvvəlki proqnozlardan fərqli olaraq, burada məqalə müəllifləri problemə gözlənilən qlobal istiləşmə ssenariləri kontekstindən yanaşıblar.
Rövşən ABBASOV, Xəzər Universiteti Ekoloji Tədqiqatlar Mərkəzinin direktoru, coğrafiya üzrə fəlsəfə doktoru, dosent, Ekologiya Nazirliyi yanında İctimai şuranın üzvü:
– Xəzər dənizinin ən mühüm xüsusiyyəti onun səviyyəsinin mütəmadi olaraq qalxıb-enməsi ilə bağlıdır. Bunun da əsas səbəbi dənizin su balansı elementlərinin dəyişməsidir. Su balansının əsas hissəsini çay axınları təşkil edir ki, onun da, təqribən, 80 faizi Volqa çayının gətirdiyi suların hesabınadır. Müşahidələr göstərir ki, çay axınları orta qiymətə nisbətən böyük intervalda dəyişikliklərə uğrayır.
Dənizə çaylar vasitəsilə gələn suların azalmasının əsas səbəbi iqlim dəyişiklikləri və Xəzər hövzəsində suya tələbatın artmasıdır. Nəticədə, Volqa, Ural və Kür kimi çayların sululuğu əhəmiyyətli dərəcədə azalır ki, bu da özünü Xəzərin səviyyəsində göstərir.
1977- ci ildə Xəzərin səviyyəsi mənfi 29 metr olub ki, bu da son 500 ildə ən aşağı göstərici hesab olunur. 1978-ci ildən başlayaraq, 1995-ci ilə qədər dəniz ən yüksək səviyyəyə çatıb. Həmin ildən etibarən isə Xəzərin səviyyəsi azalmaqdadır. Tədqiqatçılar bu azalmanı iqlim dəyişmələri və Xəzər hövzəsində su götürmələrinin artması ilə izah edirlər.
Uzun illərdir ki, Xəzərin hövzəsi ciddi çirklənməyə məruz qalır. Moskva, Volqoqrad, Saratov, Tbilisi və Yerevan kimi iri, eləcə də onlarca orta və kiçik şəhərlərdə formalaşan çirkab suları birbaşa Xəzər dənizinə axıdılır. Çirkləndiricilər də, əsasən, Volqa, Ural və Kür çayları vasitəsilə Xəzərə daxil olur. Xəzərin sahillərində yerləşən Bakı, Sumqayıt, Mahaçqala, Həştərxan, Türkmənbaşı, Rəşt və Ənzəli şəhərlərindən axıdılan tullantı suları da dənizin çirkləndirilməsində yaxından iştirak edirlər. Bununla yanaşı, 200 ilə yaxın bir müddətdə neft hasilatı zamanı ekoloji normalara lazımınca əməl edilməməsi səbəbindən dəniz neft tullantılarının güclü təsirinə məruz qalıb. Nəticədə, Xəzər dənizi həm məişət suları, həm də neft tullantıları ilə çirklənib.
Sual: – Bəs, Xəzər dənizinin bitki və heyvanat aləmi üçün getdikcə artmaqda olan təhlükəli vəziyyət nə ilə bağlıdır?
Ənvər ƏLİYEV:
– Xəzər akvatoriyası dünyanın ən nadir su heyvanlarının, onların yem bazasının məskənidir. Nadir nərəkimilərə Xəzər dənizində daha çox rast gəlinir. Burada, həm də dünyanın ən nadir, Qırmızı Kitaba düşən suitiləri yaşayır. Onlar okean sularındakı həmcinslərindən fərqlənir. Vaxtilə Xəzərdə onların sayı milyonlarla olub. Xəzər suitilərinin dərisinə maraq artandan sonra sayları azalmağa başlayıb. 2022-ci ildə Xəzərdə birdən-birə 15 min suiti tələf oldu. Maraqlı məqam ondan ibarət idi ki, həmin heyvanlar doyunca qida qəbul etdikdən sonra ölmüşdülər.
Xəzərdə biri Rusiyanın Həştərxan vilayətində, Azərbaycanda və Türkmənistanda olmaqla 3 qoruq var. Xəzər dənizi dünyanın 3 ən məşhur tektonik ərazilərindən biridir. Hər il dənizdə 2,5–4 maqnitaturada yüzlərlə zəlzələ qeydə alınır. Bu zəlzələlər nəticəsində dənizdə meta və propan qazlarının miqdarı artır. Bununla yanaşı, Xəzərdəki palçıq vulkanlarının hamısı azot tərkiblidir. Bütün bunların isə canlı aləmə mənfi təsiri getdikcə daha çox hiss olunur.
Səid SƏFƏROV:
– Son tədqiqatlar göstərir ki, Xəzərdə suitilərin populyasiyasının azalmasına səbəb olan amillərdən biri də səth temperaturun dəyişməsi ilə bağlıdır. Məlum məsələdir ki, qlobal istiləşmə ilə əlaqədar Xəzərin bütün akvatoriyasında temperatur artıb. Ancaq Xəzərin şimalında qış temperaturu azalır, ancaq yay temperaturu kəskin şəkildə yüksəlir. Bu, çox paradoksal bir haldır. Amplitudun bu şəkildə artmasına isə bir çox orqanizmlər tab gətirə bilmir. Eyni zamanda, dənizin şimal hissəsinin səviyyəsi çox aşağıdır; orta dərinlik 5 metr təşkil edir. Ona görə də dərin ərazilərdə su soyuyanda aşağıda hələ isti olur. Şimal hissədə isə su dibinə qədər soyuyur. Yayda isə əksinə, dibinə qədər istiləşir. Bu proseslər də, öz növbəsində, oksigenin azalmasına səbəb olur.
Biomüxtəlifliyin pozulması həm antropogen amillərlə, həm də iqlim dəyişiklikləri ilə əlaqədardır. Bəs, iqlim dəyişiklikləri necə təsir göstərir? Məsələn, temperatur artanda sahil zonasında suyun da temperaturu yüksəlir. Belə olan təqdirdə həll olunan oksigenin miqdarı azalır. Dənizdəki bütün canlılar oksigenlə nəfəs alır. Bəzən kütləvi informasiya vasitələrində dənizdə filan qədər balığın məhv olması ilə bağlı məlumatlara rast gəlirik. Bu isə dənizdə fitoplantonlar azalması ilə bağlıdır. Eyni zamanda, Xəzərdə gedən müəyyən proseslər də azalıb. Bununla yanaşı, dənizin səthindən dibinə qədər temperatur xeyli dəyişib. Əvvəllər bu proses tədricən baş verirdi. İndi isə hər 10 metrdə, təqribən, 4–5 dərəcə təsir edir.
Əmir ƏLİYEV:
– Xəzərə daxil olan gəmilərin də biomüxtəlifliyə təsiri danılmazdır. Son illər Rusiyaya qarşı tətbiq olunan sanksiyalarla əlaqədar bu ölkənin bütün gəmiləri Mahaçqalaya qayıtdı. Həmin gəmilər də özləri ilə zəhərli balans sular gətirdilər. Bunun da nəticəsində xeyli sayda suiti məhv oldu.
Rövşən ABBASOV:
– Kənd təsərrüfatında istifadə edilən gübrə və pestisidlər çaylar vasitəsilə Xəzər dənizinə axıdılır. Bu, əsasən, azot və fosfat gübrələridir ki, dənizdə ekosistem zəncirinə çox mənfi təsir göstərir. Mahaçqala, Həştərxan, Türkmənbaşı, Rəşt, Ənzəli şəhərlərindən birbaşa Xəzərə daxil olan çirkləndiricilər onun ekosisteminə çox mənfi təsir edir, buradakı bioloji resurslar üçün ciddi təhlükə yaradır. Bu cür cirklənmələr dəniz suyunda həll olmuş oksigeni azaltmaqla canlıların nəfəs almasını çətinləşdirir. Təkcə Xəzər sahillərində deyil, uzaqda yerləşən şəhərlərin də çirkab suları çaylar vasitəsilə dənizə axır.
Xəzər ekosisteminin uğradığı mənfi təsirlərlə əlaqədar son illər dənizdə kilkə ovu 10 dəfə azalaraq, 1999-cu ildəki 271 min tondan hazırda 27 min tona düşüb. Balıq ehtiyatlarının azalması bütün Xəzər dənizi üçün səciyyəvi olan ümumi tendensiyadır.
Göründüyü kimi, dənizin çirklən- məsinin onun bioloji ehtiyatlarına mənfi təsiri getdikcə artır. Bu, ilk növbədə, nərə balıqları populyasiyalarına ciddi təsir edir. Artıq Xəzər dənizində nərəkimilərin ehtiyatı azalaraq vətəgə əhəmiyyətini itirmək həddinə çatıb. Təkcə onu qeyd etmək kifayətdir ki, 1980-ci illərlə müqayisədə 2009–2010-cu illərdə nərə balıqlarının ov həcmi 30 dəfə azalıb. Hazırda sahilyanı ölkələrin razılığı əsasında Xəzərdə nərə balıqlarının ovu qadağan edilib.
Çirklənmə dəniz suitililərinə də mənfi təsir edir. Yeri gəlmişkən, Xəzər suitisi yeganə dəniz məməlisi və endemikidir. XX əsrin əvvəllərində Xəzər suitilərinin sayı, təqribən, 1 milyon olduğu halda, hazırda onun populyasiyası 100 min fərd təşkil edir.
Eyni zamanda, gətirilən növlər də Xəzərin bioloji ehtiyatlarına mənfi təsir edir. Belə ki, gəlmə növlər dənizin heyvanat aləminin yem bazasına çox mənfi təsir edir. Məsələn, Mnemiopsis leidyi adlı bir növün Xəzər dənizinə gəlməsi nəticəsində kilkə balıqlarının yem ehtiyatları azalıb ki, bu da onların sayına mənfi təsir etməkdədir.
Sual: Xəzər dənizi 5 sahilyanı dövlətin ümumi evidir desək, yəqin ki, yanılmarıq. Heç şübhəsiz, Xəzərlə bağlı tədqiqatların, müşahidələrin aparılması birgə fəaliyyəti, bu sahədə əməkdaşlığın genişləndirilməsi zərurətini yaradır. Bu barədə sizin fikirlərinizi bilmək maraqlı olardı...
Şövqi GÖYÇAYSKİ:
– Xəzər dənizinin problemləri vaxtaşırı müxtəlif səviyyələrdə müzakirə olunub və müsbət nəticələr əldə edilib. “Xəzər dənizinin dəniz ətraf mühitinin mühafizəsi haqqında” 2003-cü il noyabrın 4-də Tehran şəhərində imzalanan Çərçivə Konvensiyasının Azərbaycan Prezidentinin 4 aprel 2006-cı il tarixli qərarı ilə qüvvəyə minməsi tarixi hadisəyə çevrilib.
Yeri gəlmişkən, 5 Xəzəryanı dövlət–Azərbaycan, İran, Qazaxıstan, Rusiya və Türkmənistan tərəfindən dənizin zərərli, təhlükəli maddələrlə, tullantılarla çirkləndirilməsinin qarşısının alınması, onun bioloji ehtiyatlarının qorunması qarşıya mühüm vəzifə kimi qoyulub. Bununla bərabər, həmin sənəddə Xəzərin səviyyəsinin dəyişməsi probleminin diqqət mərkəzində saxlanılması, məsələnin həlli yollarının araşdırılmasının zəruriliyi vurğulanıb.
Bütün bunlar isə onu göstərir ki, Xəzərin problemlərinin həlli yuxarıda adları çəkilən 5 sahilyanı ölkənin birgə səyi ilə həll edilməlidir. Əks halda, problemlər daha da dərinləşər, nərə balığı ehtiyatı, ümumiyyətlə, canlıların rəngarəngliyi yoxa çıxar, ekosistem tənəzzülə uğraya bilər.
Onu da qeyd edim ki, Xəzər dənizinin əsas çirklənmə mənbələri onun hövzəsində, sahillərində və akvatoriyalarında nəzərə çarpır. Başqa sözlə, həmin sahələrdə bir çox şəhərlər yerləşir ki, onların sənaye müəssisələrinin çirkab suları, habelə dəniz nəqliyyatından və neft mədənlərindən daxil olan müxtəlif çirkləndiricilər Xəzərə axıdılır. Bu şəraitin normal məcraya yönəldilməsi üçün yuxarıda adıçəkilən Çərçivə Konvensiyasına qoşulan ölkələr tərəfindən birgə təxirəsalınmaz tədbirlər həyata keçirilməlidir.
Əmir ƏLİYEV:
– Yeri gəlmişkən, mən bu məqamdaXəzərin təddiqi sahəsində olan problemlərə də toxunmaq istəyirəm. Əvvəllər respublikamızda tanınmış Xəzərşünas alimlər olub. İndi isə Azərbaycanda Xəzərin öyrənilməsi ilə bağlı bir dənə də olsun, mərkəz yoxdur. Türkmənistan, Qazaxıstan, Rusiya və İranda belə mərkəzlər, elmi-tədqiqat müəssisələri var. Ölkəmizdə isə yalnız Coğrafiya İnstitutunda müvafiq şöbə fəaliyyət göstərir ki, onun da cəmi-cümlətani 2–3 əməkdaşı var. Təəssüf ki, orada lazımi müşahidələr aparmaq üçün nə bir cihaz, nə də gəmi mövcuddur.
Xəzər vahid bir canlı sistemdir. Əslində, onu çox tədqiq etməyə ehtiyac da yoxdur. Eyni zamanda, hər bir ölkənin ayrı-ayrılıqda tədqiqatlar aparması düzgün deyil. Fikrimcə, vahid bir regional mərkəz yaratmaq lazımdır ki, mütəxəssislər əlaqəli şəkildə fəaliyyət göstərə bilsinlər. Sovet dönəmində 38-ci və 44-cü coğrafi enlikdə çoxsaylı müşahidələr aparılırdı. Bütün məlumatlar isə Bakıda toplanırdı.
Mirzəxan MƏNSİMOV:
– Əmir müəllimlə tam razıyam. O zaman Bakı Xəzər dənizinin müşahidə mərkəzi rolunu oynayırdı. Mən əvvəllər 10 il müddətində Orta Asiyada çalışmışam. Sonra hidrometeorologiya sistemi ilə bağlı elmi iş yazıb müdafiə etmişəm. Bu məsələ bizə yaxşı tanışdır, onun problemlərindən də xəbərdarıq. Xəzər dənizi, bəlkə də, dünyanın ən çox tədqiq olunmuş, öyrənilmiş su obyektlərindən biridir.
Sovet dövründə elmi-tədqiqat institutlarımız, o cümlədən Coğrafiya İnstitutu Xəzərin bütün aspektləri ilə məşğul olurdular. Moskvaya da gedəndə hər şeyi Bakıda göstərirdilər. Yəni biz belə bir səviyyədə idik. Ötən əsrin 90-cı illərində biz bu səviyyəni qoruyub saxlamağa çalışdıq. Ancaq 90-cı illərdə, eləcə də yeni əsrin ilk illərində mövcud çətin vəziyyətdə buna nail ola bilmədik. Bununla belə, biz o vaxt Xəzər mərkəzi yaratmışdıq. Eyni zamanda, 1993-cü ildə Xəzərətrafı ölkələrin əlaqələndirmə komitəsini yaratmaq təşəbbüsü ilə çıxış etdik. İndi özəl sahədə fəaliyyət göstərsəm də, heç vaxt bu məsələlərdən kənar qalmamışam. Hazırda da bu sahə ilə bağlı məlumatlarımı zənginləşdirirəm, müəyyən məqalələr yazıram. Bununla belə, etiraf etmək lazımdır ki, hazırda biz Xəzərlə bağlı tədqiqatlarda, araşdırmalarda çox geri qalırıq.
Yeri gəlmişkən, Xəzərin problemləri ilə bağlı təkcə məqalələr yazmaq kifayət deyil. Hazırda sahilyanı ölkələrdə bununla bağlı konkret mərkəzlər, müşahidə və monitorinqlər sistemləri var. Həmin ölkələrdə mövsümlər üzrə tədqiqatlar, ölçmələr aparılır, bioloji resurslar hesablanır, təkliflər verilir. Bütün bunlar praktiki işlərdir. Amma bu gün biz onları edə bilmirik. Əslində, ayrı-ayrılıqda tədqiqatlar da aparmaq düzgün deyil. Yəni bütün ölkələrin tədqiqatçıları bir yerə toplaşıb müzakirələr aparmalı, təkliflər verməlidirlər. Əvvəllər Rusiyada gəmilər tədqiqata çıxırdılarsa, eyni vaxtda bütün Xəzəryanı ölkələr də bu işə qoşulurdular. Bundan da məqsəd o idi ki, toplanan məlumatlar müqayisə edilə bilsin, onların bir elmi əhəmiyyəti olsun.
Sual: “Dəyirmi masa” ətrafında gedən müzakirələrdən belə aydın olur ki, Xəzərin öyrənilməsi, dənizin səviyyə tərəddüdü, bioloji resursları və onların mühafizəsinin gücləndirilməsi üçün daha ciddi tədqiqatlara ehtiyac var. Bu da tədqiqatçı alimlərin, Xəzərşünasların yetişdirilməsini tələb edir. Bəs, ölkəmizdə bu sahədə vəziyyət necədir?
Şövqi GÖYÇAYSKİ:
– Xəzər dənizi ilə bağlı problemlər hər zaman diqqət mərkəzində saxlanılıb. Fəaliyyət göstərdiyim Bakı Dövlət Universitetində 1973-cü ildə hidrometeorologiya kafedrası yaradılmaqla həmin kafedrada Xəzər problemləri və onun həlli yolları tədris edilməyə başlamışdır. Daha sonra isə həmin universitetdə respublikada ilk dəfə olaraq ekologiya təmayüllü Ətraf mühitin mühafizəsi kafedrası yaradılıb. Onu da qeyd etməliyəm ki, 70-ci illərdən etibarən bu sahədə elmi-təhsil və innovasiya sistemlərinin birgə fəaliyyət göstərmələri sayəsində müsbət nəticələr əldə edilib. Elə həmin vaxtlarda da Xəzərin problemlərinin müzakirəyə çıxarılmasına mühüm önəm verilmişdir.
Ötən müddətdə Xəzərşünaslarımız tərəfindən respublikamızda böyük elmi məktəb yaradılmışdır. Alimlərin bu sahə ilə bağlı mövcud qurumlarla birgə fəaliyyəti nəticəsində yüksək nəticələr əldə edilib. Ən başlıcası isə elm, təhsil və innovasiya sistemlərində bir işgüzar əlaqə qurulmaqdadır.
Düşünürəm ki, təhsil, kadr hazırlığında daha böyük yüksəliş olmalıdır. Bakı Dövlət Universitetinin coğrafiya və ekologiya və torpaqşünaslıq fakültələrinin, eləcə də hidrometeorologiya kafedrasının bu sahədəki fəaliyyətini təqdirəlayiq hesab etmək olar. Həmin kafedrada iqlim dəyişiklikləri və Xəzər problemləri öyrənilir və tədris edilir.
Azərbaycan Prezidenti İlham Əliyevin 2010-cu ili Ekologiya ili elan etməsi ilə əlaqədar Bakı Dövlət Universitetində ekologiya və torpaqşünaslıq fakültəsi yaradılmışdır. Fakültənin ekokimya, bioekologiya və digər kavedraları da Xəzərin problemləri ilə məşğul olurlar.
Universitetimizdə Xəzərin ekologiyası və mühafizəsi, sahil zonalarının ekolgiyası və mühafizəsi və s. fənnlər tədris olunur. Universitetimiz Ekologiya və Təbii Sərvətlər Nazirliyi ilə ənənəvi əməkdaşlığa malikdir. Həmin sahədə əməkdaşlığın genişləndirilməsinə böyük ehtiyac vardır.
Mirzəxan MƏNSİMOV:
– Biz dənizdə müxtəlif layihələr həyata keçiririk, konstruktiv işlər görürük. Ekoloji məsələlərlə bağlı faktiki nümunələr, dib çöküntüləri götürürük. Həmin nümunələrin üzərində bioloqlar, ekoloqlar işləyirlər. Yəni biz rəsmi məlumatlar ala bilməsək də, özümüzdə müəyyən informasiyalar olur. Ona görə də bu məsələlərin nəbzini tutmağa hər an hazırıq. Deyərdim ki, bizim öz milli koordinasiyamız və milli ideyalarımız olmalıdır. Biz təhsilli xalqıq. Düşünürəm ki, ölkəmizdə Xəzərlə bağlı Elmi-Tədqiqat İnstitutu yaradılmalıdır. Yeri gəlmişkən, Xəzərdən ən çox bəhrələnən ölkə Rusiyadan sonra Azərbaycan olub. Bu məsələlərə qayıtmalıyıq. Biz, sözün əsl mənasında, dəniz ölkəsi olmalıyıq. Özəl sektorun təmsilçisi kimi, biz Coğrafiya İnstitutuna, eləcə də digər qurumlara lazımi avadanlıq və cihazlarla yardım edə bilərik.
Səid SƏFƏROV:
– Mənə elə gəlir ki, bu gün ən böyük problemimiz təhsillə, elmlə bağlı təşkilatlar arasında əlaqələrin, demək olar ki, olmaması ilə bağlıdır. İstənilən alimə təd-qiqatlar, müşahidə materialları lazımdır. Düşünürəm ki, Xəzərin səviyyəsi, sərt temperaturu, digər parametrlər haqqında informasiyalar hamı üçün əlçatan olmalı, internetdə yerləşdirilməlidir. 50 il əvvəl Azərbaycanın Mədətzadə, Şıxlınski kimi iqlimşünasları var idi. Onlar Coğrafiya İnstitutu ilə birgə fəaliyyət göstərirdilər. İndi, sanki, aramızda keçilməz sədd yaranıb.
Vaqif BAYRAMOV,
Mirbağır YAQUBZADƏ,
Elşən AĞALAR (foto)
XQ