Ümumdünya Meteorologiya Təşkilatı tərəfindən hər il martın 23-ü Ümumdünya meteorologiya günü kimi qeyd olunur. Bu günün qeyd olunmasında əsas məqsəd hidrometeorologiya ilə bağlı dünyada baş verən proseslər, xüsusilə son illər cəmiyyəti narahat edən qlobal iqlim dəyişmələri, baş verə biləcək təhlükəli hidrometeorloji proseslərə ictimaiyyətin diqqətini yönəltməkdən ibarətdir.  
 
Hazırkı dövrdə dünya su ilə bağlı streslərdən irəli gələn daha ciddi problemlərlə, quraqlıqlarla, daşqınlarla, həmçinin təmiz suya əlçatanlığın olmaması ilə üzləşir. Su resurslarının proqnozlaşdırılmasının, monitorinqinin və idarə olunmasının təcili olaraq təkmilləşdirilməsi vacib məsələrdən biridir. 
 
Suların həddindən artıq çirklənməsi problemi ilə də bir çox ölkələr qarşılaşır.  
Bununla əlaqədar Ümumdünya meteorologiya günü 2020-ci ildə “İqlim və su” ümumi mövzusu ilə qeyd olunur. İlin devizi isə “Hər damlanı qoruyaq, hər damla hesabdadır” çağırışı kimi seçilib.  
 
Bu mövzu çərçivəsində əsas diqqət iqlim və su resurslarının daha əlaqələndirilmiş və davamlı idarə olunmasına yönəldilir. Beləki, iqlim və su bir-biri ilə qırılmaz əlaqəlidirlər. Hər biri davamllı inkişafın qlobal məqsədlərinin, iqlim dəyişmələrinin və yoxsulluq risklərinin azaldılması sahələrinin əsasında durur.

Azərbaycanda hidrometeoroloji müşahidələrin təşkili, proqnozlar və xəbərdarlıqların hazırlanmasını və yayımlanmasını təmin edən qurum Ekologiya və Təbii Sərvətlər Nazirliyinin Milli Hidrometeorologiya Xidmətidir. Xidmətin operativ bölməsi olan Hidrometeoroloji Proqnozlar Bürosunda gündəlik operativ olaraq hər 3 saatdan bir havanın parametrləri - temperatur, yağıntı, görünüş, rütubətlilik, atmosfer təzyiqi, buludluq, atmosfer hadisələri və s. üzrə 84 meteoroloji stansiyadan məlumat alınır. Eyni zamanda, Xəzər dənizinin Azərbaycan sektorunda yerləşən 8 stansiyadan sutka ərzində 8 dəfə dəniz hidrometeoroloji müşahidələri - dənizin səviyyəsi, dalğalanma rejimi, suyun temperaturu və s., 41 hidroloji məntəqədən çaylar üzrə suyun səviyyəsi və su sərfi haqqında məlumatlar alınaraq təhlil edilir, gündəlik icmallarda və proqnozlarda istifadə olunur.