Ağ ev qeyri-rəsmi kanallar vasitəsilə Şərqi Avropa ölkələrindən, o cümlədən Moldova və Kosovodan ABŞ-dan deportasiya olunacaq qanunsuz miqrantları qəbul etmələrini istəyib.

AZƏRTAC xəbər verir ki, “Wall Street Journal” bu barədə mənbələrinə istinadla məlumat yayıb.

Vaşinqton, eyni zamanda, Monqolustanla, həmçinin Afrikanın dörd ölkəsi – Liviya, Esvatini, Ruanda və Beninlə qeyri-qanuni mühacirlərin qəbulu ilə bağlı danışıqlar aparır. Ağ ev paralel olaraq Latın Amerikasının iki ölkəsi - Honduras və Kosta-Rika ilə deportasiya prosesinə dair uzunmüddətli müqavilələr imzalamaq niyyətindədir. Donald Tramp administrasiyası miqrasiya böhranının həllinə yardım müqabilində bu ölkələrə maliyyə dəstəyi və siyasi imtiyazlar təklif edir.

Nəşr, həmçinin qeyd edir ki, Ağ ev artıq Panama ilə oxşar deportasiya modelini sınaqdan keçirib. Belə ki, fevral ayında Yaxın Şərqin bir neçə ölkəsinin 100-dən çox vətəndaşı Panamaya göndərilib, bundan sonra yerli hakimiyyət onları vətənlərinə qaytarmağa başlayıb.

Xatırladaq ki, Donald Tramp dəfələrlə ABŞ-ın immiqrasiya siyasətinin sərtləşdirilməsinin tərəfdarı olduğunu bildirib. Yanvarın 20-də vəzifəsinin icrasına başladıqdan sonra o, Meksika ilə sərhəddə fövqəladə vəziyyət rejimi elan edib. Eyni zamanda, ABŞ Daxili Təhlükəsizlik Departamenti hüquq-mühafizə orqanlarının səlahiyyətlərini genişləndirərək onlara qanunsuz mühacirləri immiqrasiya məhkəməsinin qərarı olmadan sürətləndirilmiş prosedurlarla deportasiya etməyə icazə verib.

“New York Post” nəşrinin məlumatına görə, Trampın andiçmə mərasimindən sonra 100 mindən çox mühacir Birləşmiş Ştatlardan çıxarılıb.