Enerji ekspertləri və şəbəkə operatorlarının fikrincə, Tramp administrasiyası tərəfindən bu həftə tətbiq edilən 10 faizlik elektrik rüsumları Kanadadan gələn enerji təchizatına mənfi təsir göstərərsə, ABŞ-da artan elektrik qiymətləri ölkənin bəzi bölgələrində daha da sürətlənə bilər.

AZƏRTAC xəbər verir ki, hökumətin məlumatına görə, ABŞ ümumi elektrik enerjisinə olan tələbatının təxminən 1 faizini idxal edir, lakin Nyu-York ştatı və Nyu-İnqlend kimi regionlar Kanadada istehsal olunan elektrik enerjisinə daha çox güvənirlər. Bu o deməkdir ki, onlar tezliklə müştərilərdən kommunal xidmətlər üzrə daha yüksək ödənişlər tələb edə bilərlər .

Bu arada, Ontario Baş naziri Daq Ford bu həftə jurnalistlərə bildirib ki, onun əyalətindən ABŞ-a elektrik enerjisi göndərilməsini dayandırmağa hazırdır. Bu, tədarükün kəsilməsinə və daha da yüksək qiymətlərə səbəb ola bilər.

Enerji ekspertlərinin fikrincə, dünyanın iki ən böyük elektrik ticarət tərəfdaşı olan ABŞ ilə Kanada arasında rüsum mübarizəsi elektrik enerjisinin kəsilməsinin qarşısını alan və qiymətləri nəzarətdə saxlayan tələb-təklif balansının pozulması təhlükəsi yaradır.

Enerji İnformasiya Administrasiyasının (EIA) məlumatına görə, ABŞ Kanada elektrik enerjisinin ən böyük idxalçısıdır və keçən il 2700 giqavat-saat satın alıb. Bu, onun Kanadaya tədarük etdiyindən təxminən 50 faiz çoxdur.