Birləşmiş Ərəb Əmirliklərində (BƏƏ) 2025-ci ilin martında yeni yol hərəkəti qaydaları ilə bağlı qanun qüvvəyə minəcək. “Russianemirates” nəşri xəbər verir ki, yeni qanunla piyadalara qarşı cəzalar sərtləşdiriləcək.

AZƏRTAC xəbər verir ki, yeni reqlament sürət həddi saatda 80 kilometrdən çox olan yolların müəyyən edilməmiş hissəsindən keçməyi qadağan edir. Qanunu pozanları azı 3 ay həbs cəzası gözləyə bilər. Bundan əlavə, bu pozuntu ən azı 10 min dirhəm cərimə ilə nəticələnəcək. Qanun pozuntusunun qəzaya səbəb olub-olmamasının heç bir fərqi yoxdur.

Hər hansı bir yolu səhv yerdən keçmək və ya işıqforun siqnalına əməl etməmək nəticəsində qəza baş verərsə, burada piyadanın məsuliyyəti də yaranır. Qanunu pozan 5 min dirhəmdən 10 min dirhəmədək cərimə ilə cəzalandırılacaq və ya həbs ediləcək.

Birləşmiş Ərəb Əmirliklərinin hakimiyyət orqanları ümid edir ki, yeni tədbirlər piyadaların davranış mədəniyyətini yaxşılaşdıracaq və bu, yollarda qəzaların azalmasına kömək edəcək. Media “MA-Traffic Consulting” şirkətinin təsisçisi, Dubay Polis İdarəsinin keçmiş rəhbəri Mustafa əl-Dahdan sitat gətirir. O, əmindir ki, daha sərt cəzalar qanunu pozanların qarşısını alacaq. Keçmiş polis zabiti misal gətirir: BƏƏ-də işıqforun qırmızı işığından keçən əcnəbi yük maşını sürücüləri vətənlərinə deportasiya olunmağa başlayandan sonra onlar tərəfindən pozuntuların sayı kəskin şəkildə azalıb.