ABŞ-ın Texas ştatının Hyuston şəhərində helikopterin qəzaya uğraması nəticəsində bir neçə nəfər ölüb.
AZƏRTAC xəbər verir ki, NBC telekanalının məlumatına görə, hadisə yerli vaxtla oktyabrın 20-si axşam saatlarında baş verib. Helikopter radio qülləsinə çırpılaraq yerə düşüb. Helikopterin düşdüyü yerdə yanğın baş verib.
Qəza zamanı helikopterin göyərtəsində dörd nəfər, o cümlədən bir uşaq olub.
Hadisə ilə bağlı təhqiqata başlanılıb.
