“Everypixel” adlı servis 2022-ci ildən süni intellekt tərəfindən tərtib edilmiş fotoların sayını müəyyənləşdirməyə başlayıb.
Bəzi statistik məlumatları və faktları təhlil etdikdən sonra servisin əməkdaşları belə nəticəyə gəliblər ki, bu müddət ərzində süni intellekt vasitəsilə 15 milyard foto tərtib edilib. İnsanların fərdi şəkildə bu qədər foto çəkmələri üçün isə 150 il vaxt lazım olub. Belə ki, ilk foto 1826-cı ildə çəkilib və həmin ildən 1975-ci ilə kimi insanlar fərdi şəkildə bu qədər sayda foto çəkiblər.
Keçən ilin aprel ayında “OpenAI” şirkəti “DALL-E 2” adlı süni intellekt sisteminin tətbiqinə başladığı andan istifadəçilər gün ərzində bu sistem vasitəsilə, təxminən, 34 milyon foto tərtib edirlər.
Səadət RZAYEVA,
“Xalq qəzeti”