Xarici işlər naziri Hakan Fidan Quranın təhqir olunması məsələsinə toxunaraq deyib: “Biz bu təzahürləri şiddətlə qınayırıq. Bu məsələ ilə bağlı beynəlxalq aktorlar və İslam ölkələri ilə ciddi danışıqlar aparırıq”.
“Anadolu” agentliyi xəbər verir ki, cənab Fidan Macarıstanın paytaxtı Budapeştdə Macarıstanın xarici işlər və ticarət naziri Peter Siyarto ilə görüşündən sonra keçirilən birgə mətbuat konfransında danışıb.
“Biz bu təzahürləri ən kəskin şəkildə pisləyirik. Bu məsələ ilə bağlı beynəlxalq aktorlar və İslam ölkələri ilə ciddi danışıqlar aparırıq”, - deyə Fidan müsəlmanların müqəddəs kitabına edilən hücumları şərh edərkən bildirib.
Türkiyənin təşəbbüsləri nəticəsində bir sıra mühüm hadisələrin baş verdiyini qeyd edən Türkiyənin xarici işlər naziri əlavə edib: “İyulun 12-də Birləşmiş Millətlər Təşkilatının (BMT) İnsan Haqları Şurası Qurana qarşı hücumları dini nifrətin təzahürü kimi qiymətləndirib. İyulun 25-də BMT Baş Assambleyası müqəddəs kitablara qarşı bütün zorakılıq aktlarının beynəlxalq hüququn pozulması kimi tanındığı qətnamə qəbul edib.
O bildirib ki, iyulun 31-də bu məsələ ilə bağlı İslam Əməkdaşlıq Təşkilatına (İƏT) üzv ölkələrin xarici işlər nazirlərinin toplantısı keçiriləcək.
“Biz ümid edirik, amma inanmırıq ki, avropalı müttəfiqlərimizin bu məsələlərdə həssaslığı artacaq”, - deyə Hakan Fidan bildirib.
Nazir bu sözlərlə tarixdən tarixi paralellər aparıb: “Hər şey Avropada kitabların yandırılması ilə başladı. İndiki kimi bu kitablar da dövlət nəzarəti altında yandırılıb. Konsentrasiya düşərgələri onun ardınca getdi və bunun necə bitdiyini bilirik”.
Onun sözlərinə görə, müqəddəs kitabların yandırılmasının ifadə azadlığı ilə heç bir əlaqəsi yoxdur.
"Xalq qəzeti"
