Heydər Əliyev Mərkəzində Türk dünyası rəssamlarının TOMRİS beynəlxalq sərgisi açılıb. Ekspozisiyanı Mədəniyyət Nazirliyi, Heydər Əliyev Mərkəzi və Beynəlxalq Türk Mədəniyyəti Təşkilatının (TÜRKSOY) birgə təşkil edib. 

Sərgidə Azərbaycan, Türkiyə, Qa­zaxıstan, Qırğızıstan və Özbəkistandan 20-yə yaxın rəssamın əsərləri nümayiş olunur. Açılış mərasimində mədəniyyət nazirinin müavini Səadət Yusifova xalqı­mızın qadın hökmdarı Tomrisin Türk dün­yasının mərkəzi fiqurlarından biri oldu­ğunu diqqətə çatdırıb. O bildirib ki, sərgi Tomris obrazına müxtəlif yanaşmaları, fərqli bədii üslubları özündə əks etdirir. 

TÜRKSOY-un Baş katibi Sultan Ra­yev isə qeyd edib ki, sərgi 8 Mart Bey­nəlxalq Qadınlar Günü ərəfəsində Türk dünyası xalqlarının qadınlara verdiyi önəmi vurğulamaq məqsədilə ilk qadın hökmdar və sərkərdə olan Tomrisə həsr edilib. Beynəlxalq Türk Mədəniyyəti və İrsi Fondunun prezidenti Aktotı Raimku­lova vurğulayıb ki, belə sərgilərin keçiril­məsi ortaq kökləri olan türk xalqları ara­sında körpülərin qurulmasına öz töhfəsini verir.

Qazaxıstan Rəssamlar İttifaqının üzvü Batagöz Toleş, “Ədəbiyyat” qəzeti­nin baş redaktoru Azər Turan, Azərbay­can Rəssamlar İttifaqı sədrinin birinci müavini Səlhab Məmmədov, Xalq rəs­samı Sakit Məmmədov sərgi haqqında fikirlərini bölüşüblər. 

Sonra sərgidə əsərləri nümayiş olu­nan rəssamlara TÜRKSOY mükafatı təqdim edilib. Azərbaycan Mədəniyyət Nazirliyi isə TÜRKSOY-un xüsusi müka­fatına layiq görülüb.

XQ