Rusiya-Gürcüstan sərhədinin Şimali Osetiya hissəsinin yaxınlığındakı Gürcüstanın Stepantsminda kəndinin administrasiyasındakı mənbə "Kommersant" ilə telefon danışığında bildirib ki, noyabrın 29-da "Kazbegi-Yuxarı Lars" keçid məntəqəsindən Rusiya Federasiyasına getmək üçün növbə gözləyən Ermənistanın dövlət nömrələri olan ağır nəqliyyat vasitələrinin sayı "min ədədə yaxınlaşıb".

Səhər saatlarında Gürcüstan mətbuatı 964 avtomobil haqqında məlumat yayıb. Ümumilikdə növbədə 2600-ə yaxın TIR var, lakin erməni sürücülər iddia edirlər ki, Rusiya gömrükçüləri, sərhədçiləri və fitosanitar nəzarəti əməkdaşları “Gürcüstan və Türkiyədən gələn avtomobilləri Ermənistandan gələn maşınlardan üç dəfə tez keçirlər”. Eyni zamanda, Ermənistandan çoxlu yük maşınları tez xarab olan məhsulları, o cümlədən meyvə və balıqları Rusiya Federasiyasına aparır. Sürücülərin sözlərinə görə, Rusiya fitosanitar nəzarəti Ermənistandan gələn yüklərə qarşı tələbləri xeyli sərtləşdirib, nəticədə avtomobillər günlərlə boş qalıb.

Kommersant yazır ki, Ermənistan nəqliyyatçılarının istifadə edə biləcəyi Rusiya Federasiyası ilə sərhəddə yeganə buraxılış məntəqəsi  Yuxarı Larsda problemlər baş nazir Nikol Paşinyanın Kollektiv Təhlükəsizlik Müqaviləsi Təşkilatının (KTMT) Minsk sammitində iştirakdan imtina etməsindən dərhal sonra, noyabrın 23-24-də Ermənistanın KTMT təlimlərini qəbul etməkdən, habelə hərbi-siyasi blokda baş katibin müavini vəzifəsinə öz nümayəndəsinin namizədliyini irəli sürməkdən imtina etməsi məlum olduqdan sonra başlayıb. 

Bundan əvvəl Ermənistan parlamenti Rusiya prezidenti Vladimir Putinə qarşı cinayət işi açan Haaqa Beynəlxalq Cinayət Məhkəməsinin Roma Statutunu ratifikasiya edib. 

Sərhəddəki problemlərin siyasi fonundan ilk olaraq “Rose Field” şirkətinin nümayəndələri danışıblar. Onların bəyanatına görə, “sərhəddə həmişə fitosanitar nəzarət olub, lakin Ermənistan yükləri üçün sərhədin tamamilə bağlanması kimi problemlər indiyədək olmayıb”.

XQ