“WhatsApp” proqramı, nəhayət, eyni zamanda birdən çox fərqli telefondan şəxsi hesaba giriş dəstəyini təqdim edib. Bu barədə Mark Zukerberq açıqlama verib.
Bildirilib ki, indiyədək istifadəçilər şəxsi “WhatsApp” hesabından bir telefonda və bir neçə köməkçi masaüstü cihazda istifadə edə bilirdilər. Lakin artıq dörd telefondan eyni hesaba daxil olmaq mümkündür.
Yeni təqdimatla istifadəçilərin mesajları digər telefonlar da daxil olmaqla cihazlar arasında sinxronlaşdırılacaq. Beləliklə, istifadəçilər bir cihaz söndürülsə belə, digər cihazlardan tətbiqə daxil ola biləcəklər. “WhatsApp” bu funksiyanın yaxın həftələrdə bütün istifadəçilər üçün əlçatan olacağını bildirib.
M. Zukerberq bloq yazısında bildirib: “Artıq mobil telefonlarda “QR kod”u oxutmaq əvəzinə, “WhatsApp Web”də mobil nömrənizi daxil etməklə birdəfəlik kod əldə edəcəksiniz. Gələcəkdə bu funksiyanı daha çox qoşulmuş cihazlara təqdim etməyi düşünürük”.
Qeyd edək ki, “WhatsApp” 2 milyarddan çox istifadəçisi olan mesajlaşma xidmətlərindən biridir. Bununla belə, söhbətlər və zənglər üçün tam şifrələmə mühafizəsi səbəbindən bu günə qədər birdən çox telefon dəstəyi yox idi.
Şirkət 2021-ci ildə seçilmiş beta istifadəçiləri ilə çox cihaz uyğunluğunu sınamağa başlayıb. Həmin vaxt açıqlama verən “Facebook” (sonradan “Meta” adı verildi) tam şifrələmə və cihazlar arasındakı mesajları sinxronlaşdırmaq üçün yeni texnologiya hazırladığını söyləyib.
Əfsanə ƏHƏDLİ, “Xalq qəzeti”