Dövlət Statistika Komitəsinin məlumatına görə, 2024-cü ilin yanvar ayında ölkədə istehlak qiymətləri indeksi əvvəlki ilin eyni dövrünə nisbətən 101,7 faiz olub. Hesabat ayında qida məhsulları, içkilər və tütün məmulatları üzrə 0,7 faiz, qeyri-qida məhsulları üzrə 1,7 faiz, əhaliyə göstərilmiş ödənişli xidmətlər üzrə isə 3,2 faizlik bahalaşma qeydə alınıb. Cari ilin ilk ayında ölkədə istehlak qiymətləri indeksi əvvəlki aya nisbətən 100,5 faiz təşkil edib.
Ötən ay qida məhsulları, içkilər və tütün məmulatları üzrə istehlak qiymətləri indeksi dekabra nisbətən 101,1 faiz təşkil edib. Ayrı-ayrı qida məhsullarından daha çox artım düyünün, qoyun və toyuq ətinin, təzə balığın, südün, yumurtanın, zeytun yağının, naringinin, limonun, bananın, almanın, narın, xiyarın, pomidorun, balqabağın, sarımsağın, soğanın, kartofun, yerkökünün, şəkərin, konfetlərin, meyvə şirəsinin, spirtli içkilərin, tütün məmulatlarının, azalma isə əsasən manna və qarabaşaq yarmasının, unun, çörəyin, mal ətinin, süfrə marqarininin, günəbaxan və qarğıdalı yağlarının, portağalın, çuğundurun, şəkər tozunun qiymətlərində müşahidə olunub.
Ay ərzində qeyri-qida məhsulları üzrə istehlak qiymətləri indeksində isə 0,1 faizlik artım qeydə alınıb. Bu növ məhsullarda artım, əsasən, qəzetlərin, şampunların, diş pastalarının, kəsilmiş taxtaların, azalma isə kərpicin, kondisionerlərin və yazı kağızlarının qiymətlərində müşahidə olunub. Yanvarda əhaliyə göstərilmiş ödənişli xidmətlər üzrə istehlak qiymətlərində heç bir dəyişiklik baş verməyib.
XQ
