Space X və Tesla şirkətlərinin qurucusu İlon Mask bildirib ki, son səkkiz ay ərzində onun həyatına iki dəfə sui-qəsdə cəhd edilib. Bu barədə amerikalı milyarder Donald Trampın seçki mitinqində güllələnməsindən sonra yazıb.

“Təhlükəli dövrlər qarşıdadır. Artıq son 8 ayda iki nəfər (ayrı-ayrı hallarda) məni öldürməyə cəhd edib. Onlar Teslanın Texasdakı qərargahından təxminən 20 dəqiqəlik məsafədə silahla həbs ediliblər”, – İlon Mask X sosial şəbəkəsində (keçmiş Twitter) yazıb.

X sosial şəbəkəsində milyarder Donald Trampa sui-qəsd cəhdi ilə bağlı daha bir neçə paylaşım edib. Onlardan birində o, cənab Trampın prezident seçkilərində namizədliyini tam dəstəklədiyini və onun tez sağalacağına ümid etdiyini yazıb. Başqa bir mesajda o, həmçinin təşviqat mitinqində məxfi xidmət rəisinin və mühafizəyə cavabdeh olan bölmənin rəhbərinin istefasını tələb edib.

Donald Trampa sui-qəsd siyasətçinin çıxışı zamanı Pensilvaniyada seçki kampaniyası zamanı baş verib. Cənab Tramp qulağından güllə yarası alıb. Etiraz aksiyasının bir iştirakçısı həlak olub, ən azı iki nəfər isə ağır yaralanıb. FTB atışmada şübhəli şəxs qismində 20 yaşlı Pensilvaniya sakini Tomas Metyu Kruksun adını çəkir. O, Məxfi Xidmət tərəfindən öldürülüb. Sui-qəsdin motivləri məlum deyil.

ABŞ-da prezident seçkiləri noyabrın 5-nə təyin edilib. Respublikaçılar Partiyasının qurultayı iyulun 15-dən 18-dək Miluoki şəhərində keçiriləcək və burada Donald Trampın seçkiyə namizədliyi gözlənilir. Onun demokrat rəqibi hazırkı ABŞ prezidenti Co Bayden ola bilər. Elon Mask əvvəllər mümkün namizədlərdən heç birinə dəstəyini açıq şəkildə bəyan etməmişdi, lakin Bloomberg-in məlumatına görə, milyarder Donald Trampın kampaniyasına pul bağışlayıb.

S.ELAY

XQ