Çinin “Fourier Intelligence” şirkəti iyulun sonunda Şanxayda keçirilən Ümumdünya Süni İntellekt Konfransında “GR-1” humanoid robotunu təqdim edib. Bu barədə “Soutern China Morning Post” qəzeti məlumat yayıb.
Bildirilir ki, şirkət robotun kütləvi istehsalına 2023-cü ilin sonuna qədər başlamağı planlaşdırır. “GR-1” humanoid robotu 2 ayaq üzərində 5 km saat sürətlə hərəkət etmək qabiliyyətinə malikdir. 2019-cu ildən bəri inkişaf mərhələsində olan robotu tərtibatçılar iki ayaqla yeridə biliblər.
“Fourier” şirkətinin təsisçisi və baş direktoru Aleks Qu bildirib: “Biz onu ilk dəfə ayaq üstə dayandığını və təkbaşına yeridiyini görəndə bu, bütün mühəndislərimiz üçün böyük sevincə səbəb oldu. Bu, yeni doğulmuş körpənin ilk addımlarını görməyə bənzəyirdi”.
Onun sözlərinə görə, robotdan yaşlılara qulluq və qonaqları qəbul etmək məqsədilə də istifadə etmək mümkün olacaq.
F. HÜQUQQIZI, “Xalq qəzeti”