Bu gündən etibarən Çin Xalq Respublikası Pekinlə Azərbaycan Respublikasının paytaxtı Bakı şəhərini birləşdirən yeni Çin–Avropa yük daşıma xəttini istifadəyə verib. Layihənin əsas məqsədi Asiya ilə Avropa arasında daha səmərəli və sürətli ticarət əlaqələrinin qurulmasıdır.

Bu barədə məlumatı “Report” agentliyi Çin KİV-lərinə istinadən yayıb. Bildirilir ki, yük daşımaları “dəmir yolu – dəniz – dəmir yolu” multimodal nəqliyyat sxemi üzrə həyata keçiriləcək.

Yeni xəttin istismarı nəticəsində yüklərin Çindən Bakıya çatdırılma müddəti cəmi 15 gün olacaq ki, bu da ənənəvi marşrutlarla müqayisədə əhəmiyyətli zaman qazancları və iqtisadi səmərəlilik deməkdir.

Məlumata görə, Çin-Avropa yük qatarı Pekin Beynəlxalq Quru Limanından, yəni paytaxtın Fanşan rayonunda yerləşən strateji logistik mərkəzdən yola düşəcək. Qatarın ilkin mərhələdə müxtəlif sənaye malları, elektronika, maşınqayırma məhsulları və istehlak malları daşıması planlaşdırılır.

Azərbaycanın tranzit mövqeyi möhkəmlənir

Ekspertlərin fikrincə, bu təşəbbüs Azərbaycanın transit və logistika qovşağı kimi artan rolunun daha bir göstəricisidir. Ölkəmiz uzun illərdir ki, Orta Dəhliz (Transxəzər Beynəlxalq Nəqliyyat Marşrutu) üzrə aparıcı iştirakçılardan biri kimi çıxış edir və Çin mallarının Avropaya, eləcə də əks istiqamətdə daşınmasında mühüm əlaqələndirici rol oynayır.

Qeyd edək ki, multimodal daşımalar “dəmir yolu–dəniz–dəmir yolu” ardıcıllığı ilə həyata keçiriləcək. Bu, yüklərin Çindən Mərkəzi Asiyaya dəmir yolu ilə, oradan Xəzər dənizi vasitəsilə Azərbaycana, daha sonra isə yenidən dəmir yolu ilə Gürcüstan və Avropa istiqamətində daşınmasına imkan verəcək.

Geosiyasi və iqtisadi əhəmiyyəti

Yeni Pekin–Bakı dəhlizi təkcə iqtisadi deyil, həm də geosiyasi baxımdan əhəmiyyətli layihə kimi dəyərləndirilir. Bu xətt Çinlə Azərbaycan arasında strateji əməkdaşlığın daha da möhkəmləndirilməsi baxımından mühüm addımdır. Xatırladaq ki, bu ilin aprelində Prezident İlham Əliyevin Çinə rəsmi səfəri zamanı logistika və nəqliyyat sahəsində əməkdaşlığın dərinləşdirilməsinə dair bir sıra mühüm razılaşmalar əldə olunmuşdu.

Eyni zamanda, “Bir Kəmər, Bir Yol” təşəbbüsünün tərkib hissəsi olan bu dəhliz Azərbaycanın iştirak etdiyi beynəlxalq nəqliyyat layihələri ilə uzlaşır və ölkəmizin “Şərq–Qərb” dəhlizində əsas tranzit ölkəyə çevrilməsi istiqamətində atılan strateji addımlardan biri hesab olunur.

Yaxın gələcəkdə genişlənmə gözlənilir

Çin tərəfinin planlarına əsasən, gələcəkdə bu marşrut üzrə yük həcmlərinin artacağı və Bakı üzərindən Türkiyə və Avropa bazarlarına inteqrasiya imkanlarının genişlənəcəyi gözlənilir. Azərbaycan isə Xəzər hövzəsindəki liman və dəmir yolu infrastrukturu vasitəsilə bu prosesdə aparıcı körpü rolunu oynamağa hazırdır.

Yeni dəhlizin istismara verilməsi, həmçinin, Rusiya üzərindən keçən Şimal marşrutuna alternativ kimi də qiymətləndirilir. Mövcud geosiyasi vəziyyətdə Çinin Orta Asiya–Qafqaz marşrutuna önəm verməsi region ölkələrinin beynəlxalq yük daşımalarında çəkisini artırır.

S.ELAY

XQ